32.4 無人 ē kā he 當做是真

32.4 Bô-lâng ē kā he tòng-chò sī chin

"Góa kā lí kóng kòe, pêng-iú," sîn-hū kóng, "che sī boeh hō͘ lán siau-mô͘ chheng-êng ê sî-kan. Tō ná chhiūⁿ tī pêng-sūn ê kok-ka, kiâⁿ-kî, sńg chhiú-kiû (‘fives’), a̍h lòng tâi-kiû lóng ē-tàng hō͘ bô sim chò-kang, bô kang-chok gī-bū, a̍h bô hoat-tō͘ chò-kang ê lâng siau-khián, á chit-chióng chheh ē-tit ìn-soat, i ê ká-siat sī, sū-si̍t mā sī án-ne, bô-lâng ē gōng kah kā he tòng-chò sī chin-si̍t ê kò͘-sū. Jû-kó ín-chún góa, chāi-chō lia̍t-ūi mā goān-ì, góa ē-sái kóng kóa iú-koan hó ê khî-sū sió-soat eng-kai ū ê phín-chit, chiah tùi lâng ū lī-ek, sīm-chì ha̍h lâng ê phín-bī. Tān, góa hi-bāng kàu-sî, góa ē-tàng kā góa ê siūⁿ-hoat, kóng hō͘ ū châi-tiāu chò chhut kái-chìn ê lâng. Á taⁿ neh, Thâu-ke Ss, chhiáⁿ siong-sìn góa só͘ kóng ê, kā chheh the̍h leh, ka-tī phòaⁿ-toàn he sī chin a̍h ké, án-ne tùi lí khah hó. Sîn pó-pì, án-ne lí tō bē pāi-hāi kah chhiūⁿ lí ê lâng-kheh Don Quixote chit-lō khoán."

"Bián hoân-ló," thâu-ke hôe-tap, "góa bē siáu kah ka-tī khì chò iû-kiap khî-sū, in-ūi góa chin chheng-chhó, taⁿ sî-tāi í-keng bô kāng ah, í-keng bô thoân-soat tiong ê chhut-miâ khî-sū kiâⁿ-ta̍h tī sè-kài ah."

Tī chèng-lâng khai-káng tang-tiong, Sancho chhut-hiān. Thiaⁿ-tio̍h in kóng-khí iû-kiap khî-sū taⁿ í-keng bô sî-kiâⁿ, só͘-ū khî-sū sió-soat lóng sī gû-gōng koh pe̍h-chha̍t, che hō͘ i kám-kak hoân-ló, mā chhìn-sim. I tī sim-lāi koat-tēng, tán khòaⁿ chú-lâng chit-chōa lí-tô͘ ū siáⁿ kiat-kó, tāi-chì nā bô chú-lâng só͘ kî-bōng ê hiah hó, i tō phah-sǹg boeh lī-khui i, tńg-khì chhōe bó͘-kiáⁿ, kòe pêng-siông ê seng-oa̍h.

Thâu-ke tú boeh the̍h-cháu siuⁿ-á kap chheh, tān sîn-hū tùi i kóng:

"Tán leh, góa siūⁿ boeh khòaⁿ he pit-chek siá kah hiah chheng-siù ê bûn-kiāⁿ sī siáⁿ-hòe?"

Thâu-ke kā bûn-kiāⁿ the̍h chhut-lâi, kau hō͘ i tha̍k. Sîn-hū hoat-hiān he sī chi̍t-hūn tāi-khài 8-ia̍h ê chhiú-kó, khí-thâu ê piau-tê kō͘ tōa-jī siá "Sit-chhek ê Hòⁿ-kî." Sîn-hū tha̍k saⁿ/sì chōa liáu, kóng:

"Góa tio̍h kóng, chit-ê sió-soat ê piau-tê khòaⁿ khí-lâi bē-bái, góa siūⁿ boeh kui-ê kā tha̍k oân."

Thâu-ke ìn kóng, "Nā án-ne, koh-hā tō kā tha̍k hō͘ thàu, in-ūi góa ē-sái hō͘ lí chai, chi̍t-kóa tòa chia ê lâng-kheh tha̍k liáu lóng chin kah-ì, koh jia̍t-sim boeh kā góa chioh. Tān góa m̄-khéng, in-ūi góa boeh kā i hêng hō͘ hit-ê kā siuⁿ-á, chheh, kap bûn-kiāⁿ bē-kì-tit tī chia ê lâng. In-ūi khó-lêng bó͘ chi̍t-kang i ē koh tńg-lâi chia. Sui-bóng góa ē hoâi-liām chiah-ê chheh, tān góa chin-sim boeh hêng-lâng. Sui-bóng góa khui kheh-chàn, góa mā sī Kitok-tô͘.”

"Án-ne chin tio̍h, pêng-iú," sîn-hū kóng, "tān, ká-sú sió-soat góa ū kah-ì, lí tio̍h ín-chún góa kā chhau-siá."

"Bô būn-tê," tiàm-chú ìn.

Tng in teh kau-tâm ê sî, Cardenio the̍h-khí sió-soat khai-sí tha̍k, kap sîn-hū ê ì-kiàn kāng-khoán, tō kiû sîn-hū kā tha̍k chhut-lâi, hō͘ ta̍k-ê lóng ē-tit thiaⁿ.

"Góa ē kā tha̍k," sîn-hū kóng, "m̄-koh taⁿ chit-ê sî-kan kám m̄-sī khah sek-ha̍p khì khùn?" 

"He tō ē hō͘ góa kàu-gia̍h ê hioh-khùn ah," Dorothea kóng, "chí-iàu pàng khin-sang thiaⁿ kò͘-sū tō ē-sái. In-ūi góa chit-chūn ê sim-sîn, sui-jiân sī khùn ê sî-kan, iáu bô pêng-chēng kah khùn ē-khì."

"Hó, kì-jiân án-ne," sîn-hū kóng, "góa tō lâi kā tha̍k, chún-kóng kan-ta sī hòⁿ-kî mā hó. Hoān-sè che mā ū siáⁿ chhù-bī ê lāi-iông."

Nicholas sai-hū mā chhiáⁿ i tha̍k, Sancho iā án-ne. Khòaⁿ tio̍h chit-khoán chêng-hóng, koh siūⁿ-tio̍h ē-tàng hō͘ ta̍k-ê hoaⁿ-hí, ka-tī mā hiáng-siū, sîn-hū tō kóng:

"Án-ne hó, ta̍k-ê chù-ì thiaⁿ, sió-soat sī án-ne khai-sí ê."

(2024-7-18)

--

32.4 無人 ē kā he 當做是真

"我 kā 你講過, 朋友," 神父講, "che 是欲 hō͘ 咱消磨清閒 ê 時間. Tō ná 像 tī 平順 ê 國家, 行棋, 耍手球 (‘fives’), a̍h 挵台球 lóng ē-tàng hō͘ 無心做工, 無工作義務, a̍h 無法度做工 ê 人消遣, á 這種冊 ē-tit 印刷, 伊 ê 假設是, 事實 mā 是 án-ne, 無人 ē 戇 kah kā he 當做是真實 ê 故事. 如果允准我, 在座列位 mā 願意, 我 ē-sái 講寡有關好 ê 騎士小說應該有 ê 品質, 才對人有利益, 甚至 ha̍h 人 ê 品味. 但, 我希望到時, 我 ē-tàng kā 我 ê 想法, 講 hō͘ 有才調做出改進 ê 人. Á 今 neh, 頭家 Ss, 請相信我所講 ê, kā 冊提 leh, ka-tī 判斷 he 是真 a̍h 假, án-ne 對你 khah 好. 神保庇, án-ne 你 tō 袂敗害 kah 像你 ê 人客 Don Quixote chit-lō 款."

"免煩惱," 頭家回答, "我袂痟 kah ka-tī 去做遊俠騎士, 因為我真清楚, 今時代已經無仝 ah, 已經無傳說中 ê 出名騎士行踏 tī 世界 ah."

Tī 眾人開講當中, Sancho 出現. 聽著 in 講起遊俠騎士今已經無時行, 所有騎士小說 lóng 是愚戇 koh 白賊, che hō͘ 伊感覺煩惱, mā 凊心. 伊 tī 心內決定, 等看主人這逝旅途有啥結果, 代誌若無主人所期望 ê hiah 好, 伊 tō 拍算欲離開伊, 轉去揣某囝, 過平常 ê 生活.

頭家拄欲提走箱仔 kap 冊, 但神父對伊講:

"等 leh, 我想欲看 he 筆跡寫 kah hiah 清秀 ê 文件是啥貨?"

頭家 kā 文件提出來, 交 hō͘ 伊讀. 神父發現 he 是一份大概 8 頁 ê 手稿, 起頭 ê 標題 kō͘ 大字寫 "失策 ê 好奇." 神父讀三四逝了, 講:

"我著講, 這个小說 ê 標題看起來袂䆀, 我想欲規个 kā 讀完."

頭家應講, "若 án-ne, 閣下 tō kā 讀 hō͘ 透, 因為我 ē-sái hō͘ 你知, 一寡蹛 chia ê 人客讀了 lóng 真佮意, koh 熱心欲 kā 我借. 但我毋肯, 因為我欲 kā 伊還 hō͘ 彼个 kā 箱仔, 冊, kap 文件袂記得 tī chia ê 人. 因為可能某一工伊 ē koh 轉來 chia. 雖罔我 ē 懷念 chiah-ê 冊, 但我真心欲還人. 雖罔我開客棧, 我 mā 是 Kitok 徒.”

"Án-ne 真著, 朋友," 神父講, "但, 假使小說我有佮意, 你著允准我 kā 抄寫."

"無問題," 店主應.

Tng in teh 交談 ê 時, Cardenio 提起小說開始讀, kap 神父 ê 意見仝款, tō 求神父 kā 讀出來, hō͘ 逐个 lóng ē-tit 聽.

"我 ē kā 讀," 神父講, "毋過今這个時間敢毋是 khah 適合去睏?" 

"He tō ē hō͘ 我夠額 ê 歇睏 ah," Dorothea 講, "只要放輕鬆聽故事 tō ē-sái. 因為我這陣 ê 心神, 雖然是睏 ê 時間, 猶無平靜 kah 睏 ē 去."

"好, 既然 án-ne," 神父講, "我 tō 來 kā tha̍k, 準講 kan-ta 是好奇 mā 好. 凡勢 che mā 有啥趣味 ê 內容."

Nicholas 師傅 mā 請伊讀, Sancho 也 án-ne. 看著這款情況, koh 想著 ē-tàng hō͘ 逐个歡喜, ka-tī mā 享受, 神父 tō 講:

"Án-ne 好, 逐个注意聽, 小說是 án-ne 開始 ê."

(2024-7-18)

--

32.4

“I have told you, friend,” said the curate, “that this is done to divert our idle thoughts; and as in well-ordered states games of chess, fives, and billiards are allowed for the diversion of those who do not care, or are not obliged, or are unable to work, so books of this kind are allowed to be printed, on the supposition that, what indeed is the truth, there can be nobody so ignorant as to take any of them for true stories; and if it were permitted me now, and the present company desired it, I could say something about the qualities books of chivalry should possess to be good ones, that would be to the advantage and even to the taste of some; but I hope the time will come when I can communicate my ideas to someone who may be able to mend matters; and in the meantime, señor landlord, believe what I have said, and take your books, and make up your mind about their truth or falsehood, and much good may they do you; and God grant you may not fall lame of the same foot your guest Don Quixote halts on.”

“No fear of that,” returned the landlord; “I shall not be so mad as to make a knight-errant of myself; for I see well enough that things are not now as they used to be in those days, when they say those famous knights roamed about the world.”

Sancho had made his appearance in the middle of this conversation, and he was very much troubled and cast down by what he heard said about knights-errant being now no longer in vogue, and all books of chivalry being folly and lies; and he resolved in his heart to wait and see what came of this journey of his master’s, and if it did not turn out as happily as his master expected, he determined to leave him and go back to his wife and children and his ordinary labour.

The landlord was carrying away the valise and the books, but the curate said to him,/

“Wait; I want to see what those papers are that are written in such a good hand.” /

The landlord taking them out handed them to him to read, and he perceived they were a work of about eight sheets of manuscript, with, in large letters at the beginning, the title of “Novel of the Ill-advised Curiosity.” The curate read three or four lines to himself, and said, /

“I must say the title of this novel does not seem to me a bad one, and I feel an inclination to read it all.” /

To which the landlord replied, “Then your reverence will do well to read it, for I can tell you that some guests who have read it here have been much pleased with it, and have begged it of me very earnestly; but I would not give it, meaning to return it to the person who forgot the valise, books, and papers here, for maybe he will return here some time or other; and though I know I shall miss the books, faith I mean to return them; for though I am an innkeeper, still I am a Christian.”

“You are very right, friend,” said the curate; “but for all that, if the novel pleases me you must let me copy it.”

“With all my heart,” replied the host.

While they were talking Cardenio had taken up the novel and begun to read it, and forming the same opinion of it as the curate, he begged him to read it so that they might all hear it.

“I would read it,” said the curate, “if the time would not be better spent in sleeping.”

“It will be rest enough for me,” said Dorothea, “to while away the time by listening to some tale, for my spirits are not yet tranquil enough to let me sleep when it would be seasonable.”

“Well then, in that case,” said the curate, “I will read it, if it were only out of curiosity; perhaps it may contain something pleasant.”

Master Nicholas added his entreaties to the same effect, and Sancho too; seeing which, and considering that he would give pleasure to all, and receive it himself, the curate said, /

“Well then, attend to me everyone, for the novel begins thus.”

c32e.jpg (11K)

--

32.3 He 冊是閒人激頭腦編出來 ê

32.3 He chheh sī êng-lâg kek thâu-náu pian chhut-lâi ê

"Hiaⁿ-tī," sîn-hū kóng, "hit nn̄g-pún chheh chiâu sī pe̍h-chha̍t, lāi-iông chhiong-móa gû-gōng koh hong-tông. Á chit-pún Tōa Goân-sòe sī chin-si̍t le̍k-sú, siá ê sī Cordova ê Gonzalo Hernandez ê sū-chek, i kō͘ chē-chē úi-tāi sêng-chiū tit-tio̍h Tōa Goân-sòe ê chit-ê chhut-miâ koh kong-chhái ê miâ-hō, mā kan-ta i ta̍t-tit chit-ê chheng-ho͘. Á Diego García de Paredes sī chi̍t-ê tòa tī Estremadura ê Trujillo chhī ê chhut-sek khî-sū, sī ke̍k ióng-kám ê su-peng, thé-la̍t tōa, kō͘ chi̍t-ki chéng-thâu-á tō ē-tàng kā ūn-choán tiong bō-pâng ê bō-lián tòng lo̍h-lâi. Tìn-siú tī kiô-thâu, i khò chi̍t-ki tn̂g-kiàm tō hō͘ kui-tūi tōa-kun bē-tit thong-kòe, í-ki̍p kî-thaⁿ chē-chē chit-khoán ê kong-chek. Nā m̄-sī i ka-tī kō͘ khî-sū ê khiam-hi kóng che, koh kā kì-lo̍k lo̍h-lâi, jî sī iû bó͘ chi̍t-ê to̍k-li̍p, kong-chèng ê chok-ka lâi siá, chiah-ê tiāⁿ-tio̍h ē hō͘ Hectors, Achilleses, kap Rolands tt ê sū-chek sit-khì kong-chhái."

"Bián phòng-hong lah," thâu-ke kóng, "chin hō͘ lâng tio̍h-kiaⁿ ê tāi-chì neh! hō͘ bō-lián thêng lo̍h-lâi! Thiⁿ ah, koh-hā mā tio̍h tha̍k góa tha̍k-kòe ê Hircania ê Felixmarte, i ê kiàm chi̍t-ē tò-sàu, tō kā 5-ê kī-jîn ùi tiong-ng chām chò koe̍h, bē-su he sī kō͘ tāu-ngeh chò-ê, chhiūⁿ gín-á sńg ê ang-á kāng-khoán. Lēng-gōa chi̍t-pái, i kong-kek chi̍t-ki kiông-tāi ê tōa kun-tūi, 160 bān lâng, choân hù bú-chong, i kā in chiàn kah li-li lak-lak, bē-su sī tùi-hù chi̍t-tīn iûⁿ-á.

"Iáu ū, lí án-chóaⁿ khòaⁿ Thrace ê Cirongilio, i ióng koh chòng? Chheh ni̍h án-ne siá, i hâng-hêng tī hô-bīn ê sî, hut-jiân ùi chúi ni̍h thàm chhut chi̍t-bóe hóe-chôa. Chi̍t-ē khòaⁿ tio̍h chôa, i sûi chông kòe, khiâ tī chôa pau-móa lîn-phìⁿ ê keng-kah-thâu, kō͘ siang-chhiú tōa-la̍t tēⁿ chôa nâ-âu, hō͘ i bô hoat-tō͘ chhoán-khùi, chí-hó koh tîm-lo̍h chúi ni̍h. Tān khî-sū m̄-goān pàng chhiú, it-ti̍t tâng-chê tîm kàu chúi-té. Tī hia, i hoat-hiān ū kiong-tiān kap hoe-hn̂g, kéng-sek súi kah bô-tè khòaⁿ. Jiân-āu, chôa piàn-chò chi̍t-ê lāu-lâng, kā i kóng chē-chē i m̄-bat thiaⁿ kòe ê tāi-chì. Léng-chēng lah, sian-siⁿ, lí nā thiaⁿ-tio̍h che, tiāⁿ-tio̍h ē thiòng kah boeh khí-siáu. Lí kóng he Tōa Goân-sòe kap Diego García kám ū ta̍t nn̄g-lia̍p bû-hoa-kó?"

Thiaⁿ tio̍h che, Dorothea khin-siaⁿ kā Cardenio kóng, "lán chit-ê tiàm thâu-ke chha-put-to ē-sái pān-ián tē-jī-ê Don Quixote neh."

"Góa mā án-ne siūⁿ," Cardenio kóng, "in-ūi, chiàu i ê piáu-hiān khòaⁿ, i kian-sìn he chheh ni̍h siá ê it-chhè lóng sī chin ê. Sīm-chì chhiah-kha siu-sū chhin-sin lâi kā khǹg mā bô-hāu."

"M̄-koh, hiaⁿ-tī ah, chhián siūⁿ chi̍t-ē," sîn-hū koh kóng, "sè-kài pēng bô Hircania ê Felixmarte, mā bô Thrace ê Cirongilio, a̍h kî-thaⁿ tī khî-sū sió-soat só͘ kì-chài ê hit-chióng khî-sū. It-chhè chiah-ê lóng sī êng-lâng kek thâu-náu só͘ pian chhut-lâi ê, bok-tek sī hō͘ lâng siau-khián, chhin-chhiūⁿ kóng tī siu-sêng hioh-khùn ê sî thang-hó tha̍k. Góa sīn-tiōng kā lí pó-chèng, sè-kài bô chit-chióng khî-sū, mā m̄-bat hoat-seng chit-chióng sū-chek a̍h hong-tông tāi-chì."

"Phiàn siáu-ê," thâu-ke kóng, "bē-su góa bē-hiáu sǹg-su̍t, gōng kah bē pê-chiūⁿ neh. Bián kā góa pián, in-ūi Thiⁿ-kong chai-iáⁿ, góa m̄-sī gōng-lâng. Chiâⁿ hó-chhiò, koh-hā chhì boeh soat-ho̍k góa, kóng, chiah-ê hó chheh só͘ siá ê, sī hong-tông tāi, sī pe̍h-chha̍t ōe. Tān in ê ìn-soat ū Hông-ka Gī-hōe ê hí-khó neh. Kám kóng Gī-hōe ê lâng ē ín-chún ìn-soat chiah chē pe̍h-chha̍t, í-ki̍p chiah chē chiàn-tàu kap mô͘-hoat, hō͘ lâng sit-khì lí-tì?"

--

32.3 He冊是閒人激頭腦編出來 ê

"兄弟," 神父講, "彼兩本冊 chiâu 是白賊, 內容充滿愚戇 koh 荒唐. Á 這本大元帥是真實歷史, 寫 ê 是 Cordova ê Gonzalo Hernandez ê 事蹟, 伊 kō͘ 濟濟偉大成就得著大元帥 ê 這个出名 koh 光彩 ê 名號, mā kan-ta 伊值得這个稱呼. Á Diego García de Paredes 是一个蹛 tī Estremadura ê Trujillo 市 ê 出色騎士, 是極勇敢 ê 士兵, 體力大, kō͘ 一支指頭仔 tō ē-tàng kā 運轉中磨房 ê 磨輪擋落來. 鎮守 tī 橋頭, 伊靠一支長劍 tō hō͘ 規隊大軍袂得通過, 以及其他濟濟這款 ê 功績. 若毋是伊 ka-tī kō͘ 騎士 ê 謙虛講 che, koh kā 記錄落來, 而是由某一个獨立, 公正 ê 作家來寫, chiah-ê 定著 ē hō͘ Hectors, Achilleses, kap Rolands tt ê 事蹟失去光彩."

"免膨風 lah," 頭家講, "真 hō͘ 人著驚 ê 代誌 neh! hō͘ 磨輪停落來! 天 ah, 閣下 mā 著讀我讀過 ê Hircania ê Felixmarte, 伊 ê 劍一下倒掃, tō kā 5 个巨人 ùi 中央鏨做 koe̍h, 袂輸 he 是 kō͘ 豆莢做 ê, 像囡仔耍 ê 尪仔仝款. 另外一擺, 伊攻擊一支強大 ê 大軍隊, 160 萬人, 全副武裝, 伊 kā in 戰 kah li-li lak-lak, 袂輸是對付一陣羊仔.

"猶有, 你按怎看 Thrace ê Cirongilio, 伊勇 koh 壯? 冊 ni̍h án-ne 寫, 伊航行 tī 河面 ê 時, 忽然 ùi 水 ni̍h 探出一尾火蛇. 一下看著蛇, 伊隨傱過, 騎 tī 蛇包滿鱗片 ê 肩胛頭, kō͘ 雙手大力捏蛇嚨喉, hō͘ 伊無法度喘氣, 只好 koh 沉落水 ni̍h. 但騎士毋願放手, 一直同齊沉到水底. Tī hia, 伊發現有宮殿 kap 花園, 景色媠 kah 無地看. 然後, 蛇變做一个老人, kā 伊講濟濟伊 m̄-bat 聽過 ê 代誌. 冷靜 lah, 先生, 你若聽著 che, 定著 ē 暢 kah 欲起痟. 你講 he 大元帥 kap Diego García kám 有值兩粒無花果?"

聽著 che, Dorothea 輕聲 kā Cardenio 講, "咱這个店頭家差不多 ē-sái 扮演第二个 Don Quixote neh."

"我 mā án-ne 想," Cardenio 講, "因為, 照伊 ê 表現看, 伊堅信 he 冊 ni̍h 寫 ê 一切 lóng 是真 ê. 甚至赤跤修士親身來 kā 勸 mā 無效."

"毋過, 兄弟 ah, 淺想一下," 神父 koh 講, "世界並無 Hircania ê Felixmarte, mā 無 Thrace ê Cirongilio, a̍h 其他 tī 騎士小說所記載 ê 彼種騎士. 一切 chiah-ê lóng 是閒人激頭腦所編出來 ê, 目的是 hō͘ 人消遣, 親像講 tī 收成歇睏 ê 時 thang-hó 讀. 我慎重 kā 你保證, 世界無這種騎士, mā m̄-bat 發生這種事蹟 a̍h 荒唐代誌."

"騙痟 ê," 頭家講, "袂輸我袂曉算術, 戇 kah 袂扒癢 neh. 免 kā 我諞, 因為天公知影, 我毋是戇人. 誠好笑, 閣下試欲說服我, 講, chiah-ê 好冊所寫 ê, 是荒唐代, 是白賊話. 但 in ê 印刷有皇家議會 ê 許可 neh. Kám 講議會 ê 人 ē 允准印刷 chiah 濟白賊, 以及 chiah 濟戰鬥 kap 魔法, hō͘ 人失去理智?"

--

32.3

“Brother,” said the curate, “those two books are made up of lies, and are full of folly and nonsense; but this of the Great Captain is a true history, and contains the deeds of Gonzalo Hernandez of Cordova, who by his many and great achievements earned the title all over the world of the Great Captain, a famous and illustrious name, and deserved by him alone; and this Diego García de Paredes was a distinguished knight of the city of Trujillo in Estremadura, a most gallant soldier, and of such bodily strength that with one finger he stopped a mill-wheel in full motion; and posted with a two-handed sword at the foot of a bridge he kept the whole of an immense army from passing over it, and achieved such other exploits that if, instead of his relating them himself with the modesty of a knight and of one writing his own history, some free and unbiased writer had recorded them, they would have thrown into the shade all the deeds of the Hectors, Achilleses, and Rolands.”

c32b.jpg (395K)

“Tell that to my father,” said the landlord. “There’s a thing to be astonished at! Stopping a mill-wheel! By God your worship should read what I have read of Felixmarte of Hircania, how with one single backstroke he cleft five giants asunder through the middle as if they had been made of bean-pods like the little friars the children make; and another time he attacked a very great and powerful army, in which there were more than a million six hundred thousand soldiers, all armed from head to foot, and he routed them all as if they had been flocks of sheep.”

c32c.jpg (341K)

“And then, what do you say to the good Cirongilio of Thrace, that was so stout and bold; as may be seen in the book, where it is related that as he was sailing along a river there came up out of the midst of the water against him a fiery serpent, and he, as soon as he saw it, flung himself upon it and got astride of its scaly shoulders, and squeezed its throat with both hands with such force that the serpent, finding he was throttling it, had nothing for it but to let itself sink to the bottom of the river, carrying with it the knight who would not let go his hold; and when they got down there he found himself among palaces and gardens so pretty that it was a wonder to see; and then the serpent changed itself into an old ancient man, who told him such things as were never heard. Hold your peace, señor; for if you were to hear this you would go mad with delight. A couple of figs for your Great Captain and your Diego García!”

Hearing this Dorothea said in a whisper to Cardenio, “Our landlord is almost fit to play a second part to Don Quixote.”

“I think so,” said Cardenio, “for, as he shows, he accepts it as a certainty that everything those books relate took place exactly as it is written down; and the barefooted friars themselves would not persuade him to the contrary.”

“But consider, brother,” said the curate once more, “there never was any Felixmarte of Hircania in the world, nor any Cirongilio of Thrace, or any of the other knights of the same sort, that the books of chivalry talk of; the whole thing is the fabrication and invention of idle wits, devised by them for the purpose you describe of beguiling the time, as your reapers do when they read; for I swear to you in all seriousness there never were any such knights in the world, and no such exploits or nonsense ever happened anywhere.”

“Try that bone on another dog,” said the landlord; “as if I did not know how many make five, and where my shoe pinches me; don’t think to feed me with pap, for by God I am no fool. It is a good joke for your worship to try and persuade me that everything these good books say is nonsense and lies, and they printed by the license of the Lords of the Royal Council, as if they were people who would allow such a lot of lies to be printed all together, and so many battles and enchantments that they take away one’s senses.”

--

32.2 啥貨! 閣下欲燒我 ê 冊!

32.2 Siáⁿ-hòe! koh-hā boeh sio góa ê chheh!

"Góa mā sī án-ne," thâu-ke-niû kóng, "in-ūi kan-ta tī lí teh thiaⁿ liām-chheh ê sî, chhù-lāi chiah ū chi̍t-sî an-chēng; in-ūi hit-sî lí choan-sim teh thiaⁿ-kó͘, chiah bē-kì-tit mē-lâng."

"Bô m̄-tio̍h," Maritornes kóng, "láu-si̍t kóng, góa mā chiâⁿ kah-ì thiaⁿ chiah-ê, in lóng chin cheng-chhái. Iû-kî kóng tio̍h bó͘ chi̍t-ūi hu-jîn kap yi ê khî-sū tī kam-á chhiū-kha sio-lám, á hit-ê ūi in chò ní-bo̍k ê lú-po̍k iū ba̍k-chhiah, iū sim-kiaⁿ ê sî. Góa kám-kak chit-chióng tāi-chì tiⁿ kah ná phang-bi̍t neh."

"Lí neh, lí án-chóaⁿ siūⁿ, sió-chiá?" sîn-hū oa̍t thâu mn̄g thâu-ke ê cha-bó͘-kiáⁿ.

"Góa m̄-chai neh, sian-siⁿ," yi kóng, "góa mā ū thiaⁿ, tān kóng si̍t-chāi, sui-bóng bô liáu-kái, m̄-koh góa kah-ì thiaⁿ. Tān góa kah-ì ê, m̄-sī goán lāu-pē só͘ kah-ì ê hit-chióng chiàn-tàu, jî sī khî-sū kap ài-jîn hun-khui sî ê ai-thàn. Khak-si̍t, ū-sî-á he hō͘ góa kám-kak tông-chêng, lâu ba̍k-sái."

"Nā án-ne, ká-sú in ê khàu sī ūi-tio̍h lí, lí ē kā in an-ùi bô, sió-chiá?" Dorothea mn̄g.

"Góa m̄-chai boeh án-chóaⁿ hó," ko͘-niû kóng, "góa kan-ta chai, ū chi̍t-kóa hu-jîn chin chân-jím, kā ka-tī ê khî-sū kiò chò hó͘ a̍h sai, a̍h chióng-chióng pháiⁿ-thiaⁿ miâ. Thiⁿ ah! góa m̄-chai yin sī siáⁿ khoán lâng, ná-ē hiah-nī léng-khok, bô-chêng, m̄-goān chù-tiōng chiàⁿ-ti̍t ê lâng, lêng-khó pàng i sí a̍h khí-siáu. Góa m̄-chai chit-chióng toan-chong ū siáⁿ hó-chhù. Nā sī ūi-tio̍h bêng-ū, ná m̄ kè hō͘ in? In só͘ su-iàu ê, tō sī án-ne."

"Shh, gín-á," thâu-ke-niû kóng, "góa khòaⁿ, lí tùi chiah-ê tāi-chì ká-ná chai chin chē neh, chit-lō tāi-chì, cha-bó͘ gín-á lâng bián chai hiah chē, mài kóng hiah chē."

"In-ūi chit-ūi sin-sū mn̄g góa, góa chóng tio̍h kā i hôe-tap."

"Án-ne hó," sîn-hū kóng, "thâu-ke sian-siⁿ, chhiáⁿ kā he chheh the̍h chhut-lâi, góa siūⁿ boeh kā khòaⁿ-māi."

"Chun-bēng," i kóng, tō ji̍p-khì pâng-keng, the̍h chhut chi̍t-ê kō͘ liān-á só-tio̍h ê kū siuⁿ-á, phah-khui liáu, sîn-hū hoat-hiān lāi-bīn ū 3-pún tōa chheh kap chi̍t-kóa pit-chek chheng-siù ê chhiú-kó. I hian-khui ê tē-it pún sī "Thrace ê Don Cirongilio," tē-jī pún sī "Hircania ê Don Felixmarte," lēng-gōa hit-pún sī "Gonzalo Hernandez de Cordova Tōa Goân-sòe ê Toān-kì, í-ki̍p Diego García de Paredes ê It-seng."

Sîn-hū tha̍k tio̍h thâu nn̄g-pún ê chheh-miâ ê sî, oa̍t-thâu hiòng thì-thâu-sai kóng, "goán pêng-iú ê koán-ke kap gōe-seng-lú nā tī chia tō hó ah lah."

"Bián lah," thì-thâu-sai kóng, "góa lâi tō ē-sái, kā che the̍h khì tiâⁿ-ni̍h a̍h hóe-lô͘, hia ū hóe tng-teh ōng."

"Siáⁿ-hòe! koh-hā boeh sio góa ê chheh!" thâu-ke kóng.

"Kan-ta chit nn̄g-pún," sîn-hū kóng, "Don Cirongilio, kap Felixmarte.”

"Kám kóng, góa ê chheh sī siáⁿ ī-toan siâ-kàu a̍h sī phoah káu-hoeh ah, lín chiah boeh kā sio hioh?" thâu-ke kóng.

"Lí kóng ê he, sī ‘phò-hāi kàu-hōe’ lah, pêng-iú," thì-thâu-sai kóng, "m̄-sī phoah káu-hoeh.”

"Sī án-ne, tio̍h," thâu-ke kóng, "m̄-koh, ká-sú lín boeh sio jīm-hô chi̍t-pún, chhiáⁿ sio iú-koan Tōa Goân-sòe kap Diego García hit-pún. Kî-thaⁿ nn̄g-pún, góa lêng-khó hō͘ lín sio chi̍t-ê kiáⁿ, mā m̄-chún lín kā sio."

--

32.2 啥貨! 閣下欲燒我 ê 冊!

"我 mā 是 án-ne," 頭家娘講, "因為 kan-ta tī 你 teh 聽念冊 ê 時, 厝內才有一時安靜; 因為彼時你專心 teh 聽古, 才袂記得罵人."

"無毋著," Maritornes 講, "老實講, 我 mā 誠佮意聽 chiah-ê, in lóng 真精彩. 尤其講著某一位夫人 kap 她 ê 騎士 tī 柑仔樹跤相攬, á 彼个為 in 做耳目 ê 女僕又目赤, 又心驚 ê 時. 我感覺這種代誌甜 kah ná 蜂蜜 neh."

"你 neh, 你按怎想, 小姐?" 神父越頭問頭家 ê 查某囝.

"我毋知 neh, 先生," 她講, "我 mā 有聽, 但講實在, 雖罔無了解, 毋過我佮意聽. 但我佮意 ê, 毋是阮老爸所佮意 ê 彼種戰鬥, 而是騎士 kap 愛人分開時 ê 哀嘆. 確實, 有時仔 he hō͘ 我感覺同情, 流目屎."

"若 án-ne, ká-sú in ê 哭是為著你, 你 ē kā in 安慰無, 小姐?" Dorothea 問.

"我毋知欲按怎好," 姑娘講, "我 kan-ta 知, 有一寡夫人真殘忍, kā ka-tī ê 騎士叫做虎 a̍h 獅, a̍h 種種歹聽名. 天 ah! 我毋知姻是啥款人, 那會 hiah-nī 冷酷, 無情, 毋願注重正直 ê 人, 寧可放伊死 a̍h 起痟. 我毋知這種端莊有啥好處. 若是為著名譽, 那毋嫁 hō͘ in? In 所需要 ê, tō 是 án-ne."

"Shh, 囡仔," 頭家娘講, "我看, 你對 chiah-ê 代誌 ká-ná 知真濟 neh, chit-lō 代誌, 查某囡仔人免知 hiah 濟, 莫講 hiah 濟."

"因為 chit 位紳士問我, 我總著 kā 伊回答."

"Án-ne 好," 神父講, "頭家先生, 請 kā he 冊提出來, 我想欲 kā 看覓."

"遵命," 伊講, tō 入去房間, 提出一个 kō͘ 鍊仔鎖著 ê 舊箱仔, 拍開了, 神父發現內面有 3 本大冊 kap 一寡筆跡清秀 ê 手稿. 伊掀開 ê 第一本是 "Thrace ê Don Cirongilio," 第二本是 "Hircania ê Don Felixmarte," 另外彼本是 "Gonzalo Hernandez de Cordova 大元帥 ê 傳記, 以及 Diego García de Paredes ê 一生."

神父讀著頭兩本 ê 冊名 ê 時, 越頭向剃頭師講, "阮朋友 ê 管家 kap 外甥女若 tī chia tō 好 ah lah."

"免 lah," 剃頭師講, "我來 tō ē-sái, kā che 提去埕 ni̍h a̍h 火爐, hia 有火 tng-teh 旺."

"啥貨! 閣下欲燒我 ê 冊!" 頭家講.

"Kan-ta chit 兩本," 神父講, "Don Cirongilio, kap Felixmarte.”

"Kám 講, 我 ê 冊是啥異端邪教 a̍h 是潑狗血 ah, 恁才欲 kā 燒 hioh?" 頭家講.

"你講 ê he, 是 '破害教會' lah, 朋友," 剃頭師講, "毋是潑狗血.”

"是 án-ne, 著," 頭家講, "m̄-koh, 假使恁欲燒任何一本, 請燒有關大元帥 kap Diego García hit 本. 其他兩本, 我寧可 hō͘ 恁燒一个囝, mā 毋准恁 kā 燒."

--

32.2

“And I just as much,” said the landlady, “because I never have a quiet moment in my house except when you are listening to someone reading; for then you are so taken up that for the time being you forget to scold.”

“That is true,” said Maritornes; “and, faith, I relish hearing these things greatly too, for they are very pretty; especially when they describe some lady or another in the arms of her knight under the orange trees, and the duenna who is keeping watch for them half dead with envy and fright; all this I say is as good as honey.”

“And you, what do you think, young lady?” said the curate turning to the landlord’s daughter.

“I don’t know indeed, señor,” said she; “I listen too, and to tell the truth, though I do not understand it, I like hearing it; but it is not the blows that my father likes that I like, but the laments the knights utter when they are separated from their ladies; and indeed they sometimes make me weep with the pity I feel for them.”

“Then you would console them if it was for you they wept, young lady?” said Dorothea.

“I don’t know what I should do,” said the girl; “I only know that there are some of those ladies so cruel that they call their knights tigers and lions and a thousand other foul names: and Jesus! I don’t know what sort of folk they can be, so unfeeling and heartless, that rather than bestow a glance upon a worthy man they leave him to die or go mad. I don’t know what is the good of such prudery; if it is for honour’s sake, why not marry them? That’s all they want.”

“Hush, child,” said the landlady; “it seems to me thou knowest a great deal about these things, and it is not fit for girls to know or talk so much.”

“As the gentleman asked me, I could not help answering him,” said the girl.

“Well then,” said the curate, “bring me these books, señor landlord, for I should like to see them.”

“With all my heart,” said he, and going into his own room he brought out an old valise secured with a little chain, on opening which the curate found in it three large books and some manuscripts written in a very good hand. The first that he opened he found to be “Don Cirongilio of Thrace,” and the second “Don Felixmarte of Hircania,” and the other the “History of the Great Captain Gonzalo Hernandez de Cordova, with the Life of Diego García de Paredes.”

When the curate read the two first titles he looked over at the barber and said, “We want my friend’s housekeeper and niece here now.”

“Nay,” said the barber, “I can do just as well to carry them to the yard or to the hearth, and there is a very good fire there.”

“What! your worship would burn my books!” said the landlord.

“Only these two,” said the curate, “Don Cirongilio, and Felixmarte.”

“Are my books, then, heretics or phlegmatics that you want to burn them?” said the landlord.

“Schismatics you mean, friend,” said the barber, “not phlegmatics.”

“That’s it,” said the landlord; “but if you want to burn any, let it be that about the Great Captain and that Diego García; for I would rather have a child of mine burnt than either of the others.”

--

32. Don Quixote 一行人 tī 客棧 ê 遭遇/ 32.1 Don Quixote 倒落 tō 一直睏

32. Don Quixote chi̍t-kiâⁿ lâng tī kheh-chàn ê cho-gū

32.1 Don Quixote tó--lo̍h tō it-ti̍t khùn

Chia̍h chi̍t-tǹg pá liáu-āu, in sûi chiūⁿ-lō͘, chi̍t-lō͘ pêng-sūn, bô siáⁿ ta̍t-tit kóng. In tī keh-kang lâi kàu kheh-chàn, chia sī Sancho Panza kài kiaⁿ ê só͘-chāi. Sui-bóng i lêng-goān mài ji̍p-khì, tān mā bô hoat-tō͘. Tiàm thâu-ke, thâu-ke-niû, in cha-bó͘-kiáⁿ, í-ki̍p Maritornes khòaⁿ tio̍h Don Quixote kap Sancho lâi, lóng móa-sim hoaⁿ-hí chhut-lâi gêng-chiap, Don Quixote kám-kak siū tiōng-sī koh ū bīn-chú, tō hoan-hù in khoán chi̍t-téng pí téng-pái khah hó ê bîn-chhn̂g. Thâu-ke-niû ìn kóng, i nā khéng hù pí téng-pái khah chē chîⁿ, yi ē-sái kā chún-pī ông-chú kip ê bîn-chhn̂g. Don Quixote kóng hó, só͘-tì in tī kāng téng-pái hit-ê lâu-kông kā khoán chi̍t-téng bē-bái ê. I sûi tó lo̍h-lâi, in-ūi í-keng chin thiám koh khiàm-bîn.

Pâng-keng mn̂g chi̍t-ē koaiⁿ hó, thâu-ke-niû sûi chông hiòng thì-thâu-sai, lia̍h-tiâu i ê chhùi-chhiu, kóng:

"Góa si̍t-si̍t kā lí kóng, lí bē-sái koh kō͘ góa he gû-bóe chò lí ê chhùi-chhiu ah lah. Kā he bóe hêng góa, chiâⁿ kiàn-siàu, goán ang ê mi̍h-kiāⁿ án-ne phiaⁿ tī thô͘-kha. Góa sī kóng, góa it-hiòng chhah tī gû-bóe ê loa̍h-á lah."

Sui-bóng yi la̍k tiâu-tiâu, thì-thâu-sai iáu-sī m̄-goān pàng, it-ti̍t kàu sîn-hū kiò i kā he hêng yi, in-ūi bô su-iàu koh iōng hit-ê kè-chhek ah. Taⁿ i ē-sái piáu-bêng sin-hūn, chò ka-tī ah, kā Don Quixote kóng, i tú-tio̍h chûn-lô͘ chhiúⁿ-kiap, chiah cháu lâi kheh-chàn chia. I nā mn̄g-khí kong-chú ê sū-chiông, in ē-sái kā kóng, yi í-keng phài sū-chiông seng kiâⁿ, khì thong-ti ông-kok ê chú-bîn, kóng, kong-chú boeh kàu ah, chhōa kiù-peng lâi ah.

Chū án-ne, thì-thâu-sai hoaⁿ-hoaⁿ hí-hí kā gû-bóe hêng hō͘ thâu-ke-niû, í-ki̍p ūi-tio̍h kiù Don Quixote só͘ chioh ê só͘-ū ke-si. Kui kheh-chàn ê lâng lóng chàn-thàn Dorothea ê bí-māu, sīm-chì mā o-ló khòaⁿ-iûⁿ-á Cardenio seⁿ-chò ian-tâu. Sîn-hū hoan-hù in khoán kheh-chàn ê hó-liāu lâi chia̍h. Thâu-ke ūi-tio̍h boeh ke thàn-chîⁿ, tō pān chi̍t-tǹg bē-bái ê àm-tǹg. Kāng chit-sî, Don Quixote it-ti̍t teh khùn, in jīn-ûi hō͘ khùn pí chia̍h koh-khah hó.

Chia̍h-àm ê sî, kui-tīn lâng ū thâu-ke, in bó͘, cha-bó͘-kiáⁿ, Maritornes, í-ki̍p só͘-ū ê lí-kheh. In tâm-lūn Don Quixote ê kî-koài siáu-kông, í-ki̍p chhōe-tio̍h i ê keng-kòe. Thâu-ke-niû kóng-khí i kap ku-lí tiong-kan ê tāi-chì. Jiân-āu yi sì-kho͘-liàn-tńg khòaⁿ chi̍t-ē, khòaⁿ bô Sancho tī hia, tō kā i hông kō͘ thán-á phau ê tāi-chì kóng hō͘ in thiaⁿ. Ta̍k-ê thiaⁿ kah chiok chhù-bī. Tān, thiaⁿ-tio̍h sîn-hū kóng, Don Quixote sī in-ūi tha̍k khî-sū sió-soat thâu-khak chiah piàn pháiⁿ, kheh-chàn thâu-ke kóng:

"Góa bē liáu-kái he ná-ū khó-lêng, in-ūi chāi góa khòaⁿ, he sī sè-kài-it ê sió-soat, góa mā ū nn̄g/saⁿ pún, í-ki̍p kî-thaⁿ chok-phín, he lóng chiok ū kè-ta̍t, m̄-nā tùi góa, tùi chē-chē lâng mā sī án-ne. In-ūi ta̍k-pái kàu siu-sêng ê kùi-chiat, siu-sêng ê lâng nā hioh-khùn tō lâi chia, kî-tiong chóng-sī ū lâng bat-jī, tō the̍h-khí kî-tiong chi̍t-pún chheh, goán tō ûi tī i sin-piⁿ, 30 thóng lâng thiaⁿ i tha̍k-chheh, hoaⁿ-hoaⁿ hí-hí, ká-ná phú-sek thâu-chang piàn khah siàu-liân ah lah. Siōng-bô, góa ē-sái kóng, ta̍k-pái thiaⁿ-tio̍h khî-sū piàⁿ-miā chiàn-tàu ê sî, góa chóng-sī hi-bāng ka-tī mā ē-tàng án-ne. Góa kah-ì mê liân ji̍t thiaⁿ hit-khoán kó͘ neh."

--

32. Don Quixote 一行人 ti 客棧 ê 遭遇

32.1 Don Quixote 倒落 tō 一直睏

食一頓飽了後, in 隨上路, 一路平順, 無啥值得講. In tī 隔工來到客棧, chia 是 Sancho Panza kài 驚 ê 所在. 雖罔伊寧願莫入去, 但 mā 無法度. 店頭家, 頭家娘, in 查某囝, 以及 Maritornes 看著 Don Quixote kap Sancho 來, lóng 滿心歡喜出來迎接, Don Quixote 感覺受重視 koh 有面子, tō 吩咐 in 款一頂比頂擺 khah 好 ê 眠床. 頭家娘應講, 伊若肯付比頂擺 khah 濟錢, 她 ē-sái kā 準備王子級 ê 眠床. Don Quixote 講好, 所致 in tī 仝頂擺彼个樓栱 kā 款一頂袂䆀 ê. 伊隨倒落來, 因為已經真忝 koh 欠眠.

房間門一下關好, 頭家娘隨傱向剃頭師, 掠牢伊 ê 喙鬚, 講:

"我實實 kā 你講, 你袂使 koh kō͘ 我 he 牛尾做你 ê 喙鬚 ah lah. Kā he 尾還我, 誠見笑, 阮翁 ê 物件 án-ne 抨 tī 塗跤. 我是講, 我一向插 tī 牛尾 ê 捋仔 lah."

雖罔她 la̍k 牢牢, 剃頭師猶是毋願放, 一直到神父叫伊 kā he 還她, 因為無需要 koh 用彼个計策 ah. 今伊 ē-sái 表明身份, 做 ka-tī ah, kā Don Quixote 講, 伊拄著船奴搶劫, 才走來客棧 chia. 伊若問起公主 ê 侍從, in ē-sái kā 講, 她已經派侍從先行, 去通知王國 ê 子民, 講, 公主欲到 ah, 𤆬救兵來 ah.

自 án-ne, 剃頭師歡歡喜喜 kā 牛尾還 hō͘ 頭家娘, 以及為著救 Don Quixote 所借 ê 所有家私. 規客棧 ê 人 lóng 讚嘆 Dorothea ê 美貌, 甚至 mā o-ló 看羊仔 Cardenio 生做 ian-tâu. 神父吩咐 in 款客棧 ê 好料來食. 頭家為著欲加趁錢, tō 辦一頓袂䆀 ê 暗頓. 仝這時, Don Quixote 一直 teh 睏, in 認為 hō͘ 睏比食 koh-khah 好.

食暗 ê 時, 規陣人有頭家, in 某, 查某囝, Maritornes, 以及所有 ê 旅客. In 談論 Don Quixote ê 奇怪痟狂, 以及揣著伊 ê 經過. 頭家娘講起伊 kap ku-lí 中間 ê 代誌. 然後她四箍輾轉看一下, 看無 Sancho tī hia, tō kā 伊 hông kō͘ 毯仔拋 ê 代誌講 hō͘ in 聽. 逐个聽 kah 足趣味. 但, 聽著神父講, Don Quixote 是因為讀騎士小說頭殼才變歹, 客棧頭家講:

"我袂了解 he 那有可能, 因為在我看, he 是世界 it ê 小說, 我 mā 有兩三本, 以及其他作品, he lóng 足有價值, 毋但 tùi 我, tùi 濟濟人 mā 是 án-ne. 因為逐擺到收成 ê 季節, 收成 ê 人若歇睏 tō 來 chia, 其中總是有人 bat 字, tō 提起其中一本冊, 阮 tō 圍 tī 伊身邊, 30 捅人聽伊讀冊, 歡歡喜喜, ká-ná 殕色頭鬃變 khah 少年 ah lah. 上無, 我 ē-sái 講, 逐擺聽著騎士拚命戰鬥 ê 時, 我總是希望 ka-tī mā ē-tàng án-ne. 我佮意暝連日聽彼款古 neh."

--

CHAPTER XXXII.

WHICH TREATS OF WHAT BEFELL DON QUIXOTE’S PARTY AT THE INN

c32a.jpg (132K)

32.1

Their dainty repast being finished, they saddled at once, and without any adventure worth mentioning they reached next day the inn, the object of Sancho Panza’s fear and dread; but though he would have rather not entered it, there was no help for it. The landlady, the landlord, their daughter, and Maritornes, when they saw Don Quixote and Sancho coming, went out to welcome them with signs of hearty satisfaction, which Don Quixote received with dignity and gravity, and bade them make up a better bed for him than the last time: to which the landlady replied that if he paid better than he did the last time she would give him one fit for a prince. Don Quixote said he would, so they made up a tolerable one for him in the same garret as before; and he lay down at once, being sorely shaken and in want of sleep.

No sooner was the door shut upon him than the landlady made at the barber, and seizing him by the beard, said:

“By my faith you are not going to make a beard of my tail any longer; you must give me back my tail, for it is a shame the way that thing of my husband’s goes tossing about on the floor; I mean the comb that I used to stick in my good tail.”

But for all she tugged at it the barber would not give it up until the licentiate told him to let her have it, as there was now no further occasion for that stratagem, because he might declare himself and appear in his own character, and tell Don Quixote that he had fled to this inn when those thieves the galley slaves robbed him; and should he ask for the princess’s squire, they could tell him that she had sent him on before her to give notice to the people of her kingdom that she was coming, and bringing with her the deliverer of them all. /

On this the barber cheerfully restored the tail to the landlady, and at the same time they returned all the accessories they had borrowed to effect Don Quixote’s deliverance. All the people of the inn were struck with astonishment at the beauty of Dorothea, and even at the comely figure of the shepherd Cardenio. The curate made them get ready such fare as there was in the inn, and the landlord, in hope of better payment, served them up a tolerably good dinner. All this time Don Quixote was asleep, and they thought it best not to waken him, as sleeping would now do him more good than eating.

While at dinner, the company consisting of the landlord, his wife, their daughter, Maritornes, and all the travellers, they discussed the strange craze of Don Quixote and the manner in which he had been found; and the landlady told them what had taken place between him and the carrier; and then, looking round to see if Sancho was there, when she saw he was not, she gave them the whole story of his blanketing, which they received with no little amusement. But on the curate observing that it was the books of chivalry which Don Quixote had read that had turned his brain, the landlord said:

“I cannot understand how that can be, for in truth to my mind there is no better reading in the world, and I have here two or three of them, with other writings that are the very life, not only of myself but of plenty more; for when it is harvest-time, the reapers flock here on holidays, and there is always one among them who can read and who takes up one of these books, and we gather round him, thirty or more of us, and stay listening to him with a delight that makes our grey hairs grow young again. At least I can say for myself that when I hear of what furious and terrible blows the knights deliver, I am seized with the longing to do the same, and I would like to be hearing about them night and day.”

--

31.5 以後免來 kā 我救助

31.5 Í-āu bián lâi kā góa kiù-chō͘

"I m̄-nā bô hù hō͘ góa," siàu-liân ìn, "tán koh-hā chi̍t-ē kiâⁿ-chhut chhiū-nâ, kan-ta chhun goán nn̄g-lâng ê sî, i sûi koh kā góa pa̍k tī kāng hit-châng chhiūⁿ-chhiū, koh kā góa sut, sut kah ná pak-phôe ê Sèng Bartholomew. Múi sut góa chi̍t-ē, i tō tòe leh kóng chi̍t-kù khau-sé koh-hā ê ngó͘-jîn ōe. Nā m̄-sī thiàⁿ kah boeh sí, khióng-kiaⁿ góa thiaⁿ he mā ē chhiò chhut-lâi. 

"Kán-tan kóng, i kā góa sut kah hit-khoán thé, góa tú-tú chiah ùi pēⁿ-īⁿ chhut-lâi, lóng sī teh tī-liâu hit-ê pi-phí chò-sit lâng só͘ chō-sêng ê siong-hāi. Che mā tio̍h koài koh-hā, in-ūi lí nā kiâⁿ ka-tī ê lō͘, mài khì bô eng-kai khì ê só͘-chāi, mài chhap pa̍t-lâng ê tāi-chì, goán chú-lâng kā góa sut 10 a̍h 20 thóng-ē, i tō ē boán-chiok, kā góa tháu lo̍h-lâi, kā khiàm ê kang-chu hù hō͘ góa. Tān, koh-hā án-ne kā i ge̍k-thāi, koh kā i mē hiah thiám, chiah ē ín i hóe-tōa. M̄-koh, i iū-koh bē-tit tùi lí án-chóaⁿ, chi̍t-ē khòaⁿ lí í-keng lī-khui, chŏaⁿ kā kui-pak hóe tùi góa hoat-chok, hō͘ góa kám-kak bē-su bē-tàng koh chò cha-po͘-kiáⁿ ah."

"Bái tō bái tī góa kiâⁿ-khui," Don Quixote kóng, "góa si̍t-chāi eng-kai tán kàu khòaⁿ tio̍h lí the̍h tio̍h chîⁿ chiah kiâⁿ-khui. Ùi kú-nî keng-giām góa eng-kai chai-iáⁿ, chit-chióng pháiⁿ-kiáⁿ nā bô lâng kin, i sī bē chun-siú iok-sok. M̄-koh, lí ē-kì-tit lah hoⁿh, Andres, góa ū chiù-chōa, i nā m̄ hù chîⁿ hō͘ lí, góa boeh khì chhōe i, chún-kóng i bih tī hái-ang ê pak-tó͘, mā boeh kā chang chhut-lâi." 

"Tio̍h, sī án-ne," Andres kóng, "m̄-koh án-ne mā bô-hāu."

"Chin kín lí tō ē khòaⁿ-tio̍h ū-hāu a̍h bô," Don Quixote kóng. Án-ne kóng liáu, i kín-kín khí-sin, hoan-hù Sancho kā tng-teh chia̍h-chháu ê Rocinante khoán hó-sè. Dorothea mn̄g i phah-sǹg boeh chhòng-siáⁿ. I ìn kóng, i boeh khì chhōe hit-ê pháiⁿ-kiáⁿ, chhú-hoa̍t i chit-chióng siâ-ok ê hêng-ûi, pó-chèng Andres the̍h-tio̍h kang-chîⁿ, 1 sén to bô khiàm, bô-lūn choân sè-kài ê pháiⁿ-kiáⁿ án-chóaⁿ hoán-tùi. Thiaⁿ-tio̍h che, Dorothea thê-chhéⁿ i kóng, kin-kì i tah-èng ê iok-sok, tī oân-sêng tùi yi ê pang-chān chìn-chêng, i bē-sái chhap kî-thaⁿ ê sū-hāng. Che, i phēng jīm-hô lâng koh-khah liáu-kái, i tio̍h khek-chè ka-tī ê jia̍t-chêng, it-ti̍t kàu ùi yi ê ông-kok tò-tńg-lâi.

"Sī án-ne, bô m̄-tio̍h," Don Quixote kóng, "á Andres tio̍h ài ū nāi-sim, ná sió-chiá só͘ kóng ê án-ne, tán kàu góa tńg-lâi. Góa koh chiù-chōa chi̍t-pái, it-ti̍t kàu góa ūi Andres pò-siû, khòaⁿ i siu-tio̍h kang-chîⁿ, nā-bô góa bē kan-hiu."

"Góa tùi he chiù-chōa bô sìn-sim," Andres kóng, "góa lêng-khó taⁿ ū cheh siáⁿ pang-chān góa khì Seville, chiah bô chhap sè-kài it-chhè ê ho̍k-siû. Lín nā ū siáⁿ thang chia̍h, hō͘ góa ē-tàng chah-tio̍h, chhiáⁿ hō͘ góa pah. Sîn ē pó-pì koh-hā í-ki̍p só͘-ū ê iû-kiap khî-sū. Tān-goān chèng-ūi khî-sū ê sū-gia̍p sūn-lī, tō ná góa só͘ tit-tio̍h ê án-ne."

Sancho ùi tē-á the̍h chhut chi̍t-tè pháng, koh the̍h chi̍t-tè chhiz, kau hō͘ siàu-liân-ke, kóng, "Che, the̍h khì, Andres hiaⁿ-tī, lí ê put-hēng, goán mā ē kám-kak kan-khó͘."

"Kóng siáⁿ, ū siáⁿ hó kan-khó͘?"

"Góa hō͘ lí ê páng kap chhiz lah," Sancho hôe-tap, "Sîn chiah chai, góa sī m̄-sī ka-tī ū su-iàu che bô. Góa kā lí kóng, pêng-iú, chò iû-kiap khî-sū ê sū-chiông, goán tio̍h jím-siū chē-chē iau-ki kap chai-lān, sīm-chì kî-thaⁿ tāi-chì, he tio̍h chhin-sin thé-giām chiah ē-chai, m̄-sī kō͘ kóng ê."

Andres the̍h he pháng kap chhiz, khòaⁿ bô lâng koh hō͘ i siáⁿ, tō thâu lê-lê, chún-pī boeh koh chiūⁿ-lō͘. Lī-khui chìn-chêng, i án-ne kóng:

"Khòaⁿ tī Sîn ê ài, Iû-kiap Khî-sū Sià, lí nā koh tú-tio̍h góa, chún-kóng lí khòaⁿ-tio̍h in teh kā góa tok chò koe̍h, bián lâi kā góa kìu-chō͘, pàng góa lâu tī ka-tī ê put-hēng. Góa ka-tī ê put-hēng, khah án-chóaⁿ to bē tōa kah phēng hō͘ koh-hā pang-chō͘ liáu-āu hiah tōa. Sîn tio̍h chiù-chhàm koh-hā í-ki̍p thian-hā só͘-ū ê iû-kiap khî-sū."

Don Quixote tú boeh khiā khí-lâi kā kàu-hùn chi̍t-ē, m̄-koh Andres khí-kha tō cháu, kín kah bô lâng tòe ē-tio̍h hiah kín. Don Quixote hō͘ Andres ê ōe kóng kah kài bô bīn-chú, kî-thaⁿ lâng soah tio̍h jím-tiâu mài chhiò chhut-lâi, bián-tit i chhōe bô thô͘-khang thang bih.

[2024-7-13]

--

31.5 以後免來 kā 我救助

"伊毋但無付 hō͘ 我," 少年應, "等閣下一下行出樹林, kan-ta 賰阮兩人 ê 時, 伊隨 koh kā 我縛 tī 仝 hit 叢橡樹, koh kā 我 sut, sut kah ná 剝皮 ê 聖 Bartholomew. 每 sut 我一下, 伊 tō 綴 leh 講一句剾洗閣下 ê 五仁話. 若毋是疼 kah 欲死, 恐驚我聽 he mā ē 笑出來. 

"簡單講, 伊 kā 我 sut kah 彼款體, 我拄拄才 ùi 病院出來, lóng 是 teh 治療彼个卑鄙做穡人所造成 ê 傷害. Che mā 著怪閣下, 因為你若行 ka-tī ê 路, 莫去無應該去 ê 所在, 莫 chhap 別人 ê 代誌, 阮主人 kā 我 sut 10 a̍h 20 捅下, 伊 tō ē 滿足, kā 我敨落來, kā 欠 ê 工資付 hō͘ 我. 但, 閣下 án-ne kā 伊虐待, koh kā 伊罵 hiah 忝, 才 ē 引伊火大. 毋過, 伊 iū-koh 袂得 tùi 你按怎, 一下看你已經離開, chŏaⁿ kā 規腹火 tùi 我發作, hō͘ 我感覺袂輸 bē-tàng koh 做查埔囝 ah."

"䆀 tō 䆀 tī 我行開," Don Quixote 講, "我實在應該等到看著你提著錢才行開. Ùi 久年經驗我應該知影, 這種歹囝若無人跟, 伊是袂遵守約束. 毋過, 你會記得 lah hoⁿh, Andres, 我有咒誓, 伊若毋付錢 hō͘ 你, 我欲去揣伊, 準講伊覕 tī 海翁 ê 腹肚, mā 欲 kā 㨑出來." 

"著, 是 án-ne," Andres 講, "毋過 án-ne mā 無效."

"真緊你 tō ē 看著有效 a̍h 無," Don Quixote 講. Án-ne 講了, 伊緊緊起身, 吩咐 Sancho kā tng-teh 食草 ê Rocinante 款好勢. Dorothea 問伊拍算欲創啥. 伊應講, 伊欲去揣彼个歹囝, 處罰伊這種邪惡 ê 行為, 保證 Andres 提著工錢, 1 sén to 無欠, 無論全世界 ê 歹囝按怎反對. 聽著 che, Dorothea 提醒伊講, 根據伊答應 ê 約束, tī 完成 tùi 她 ê 幫贊進前, 伊袂使 chhap 其他 ê 事項. Che, 伊並任何人 koh-khah 了解, 伊著克制 ka-tī ê 熱情, 一直到 ùi 她 ê 王國倒轉來.

"是 án-ne, 無毋著," Don Quixote 講, "á Andres 著愛有耐心, ná 小姐所講 ê án-ne, 等到我轉來. 我 koh 咒誓一擺, 一直到我為 Andres 報仇, 看伊收著工錢, 若無我袂干休."

"我 tùi he 咒誓無信心," Andres 講, "我寧可今有 cheh 啥幫贊我去 Seville, 才無 chhap 世界一切 ê 復仇. 恁若有啥 thang 食, hō͘ 我 ē-tàng 扎著, 請 hō͘ 我 pah. 神 ē 保庇閣下以及所有 ê 遊俠騎士. 但願眾位騎士 ê 事業順利, tō ná 我所得著 ê án-ne."

Sancho ùi 袋仔提出一塊 pháng, koh 提一塊 chhiz, 交 hō͘ 少年家, 講, "Che, 提去, Andres 兄弟, 你 ê 不幸, 阮 mā ē 感覺艱苦."

"講啥, 有啥好艱苦?"

"我 hō͘ 你 ê páng kap chhiz lah," Sancho 回答, "神才知, 我是毋是 ka-tī 有需要 che 無. 我 kā 你講, 朋友, 做遊俠騎士 ê 侍從, 阮著忍受濟濟枵飢 kap 災難, 甚至其他代誌, he 著親身體驗才 ē 知, 毋是 kō͘ 講 ê."

Andres 提 he pháng kap chhiz, 看無人 koh hō͘ 伊啥, tō 頭 lê-lê, 準備欲 koh 上路. 離開進前, 伊 án-ne 講:

"看 tī 神 ê 愛, 遊俠騎士 Sià, 你若 koh 拄著我, 準講你看著 in teh kā 我剁做 koe̍h, 免來 kā 我救助, 放我留 tī ka-tī ê 不幸. 我 ka-tī ê 不幸, khah 按怎 to 袂大 kah 並 hō͘ 閣下幫助了後 hiah 大. 神著咒懺閣下以及天下所有 ê 遊俠騎士."

Don Quixote 拄欲徛起來 kā 教訓一下, 毋過 Andres 起跤 tō 走, 緊 kah 無人綴 ē-tio̍h hiah 緊. Don Quixote hō͘ Andres ê 話講 kah kài 無面子, 其他人 soah 著忍牢莫笑出來, 免得伊揣無塗空 thang 覕.

[2024-7-13]

--

31.5

“Not only did he not pay me,” replied the lad, “but as soon as your worship had passed out of the wood and we were alone, he tied me up again to the same oak and gave me a fresh flogging, that left me like a flayed Saint Bartholomew; and every stroke he gave me he followed up with some jest or gibe about having made a fool of your worship, and but for the pain I was suffering I should have laughed at the things he said. /

In short he left me in such a condition that I have been until now in a hospital getting cured of the injuries which that rascally clown inflicted on me then; for all which your worship is to blame; for if you had gone your own way and not come where there was no call for you, nor meddled in other people’s affairs, my master would have been content with giving me one or two dozen lashes, and would have then loosed me and paid me what he owed me; but when your worship abused him so out of measure, and gave him so many hard words, his anger was kindled; and as he could not revenge himself on you, as soon as he saw you had left him the storm burst upon me in such a way, that I feel as if I should never be a man again.”

“The mischief,” said Don Quixote, “lay in my going away; for I should not have gone until I had seen thee paid; because I ought to have known well by long experience that there is no clown who will keep his word if he finds it will not suit him to keep it; but thou rememberest, Andres, that I swore if he did not pay thee I would go and seek him, and find him though he were to hide himself in the whale’s belly.”

“That is true,” said Andres; “but it was of no use.”

“Thou shalt see now whether it is of use or not,” said Don Quixote; and so saying, he got up hastily and bade Sancho bridle Rocinante, who was browsing while they were eating. Dorothea asked him what he meant to do. He replied that he meant to go in search of this clown and chastise him for such iniquitous conduct, and see Andres paid to the last maravedi, despite and in the teeth of all the clowns in the world. To which she replied that he must remember that in accordance with his promise he could not engage in any enterprise until he had concluded hers; and that as he knew this better than anyone, he should restrain his ardour until his return from her kingdom.

“That is true,” said Don Quixote, “and Andres must have patience until my return as you say, señora; but I once more swear and promise not to stop until I have seen him avenged and paid.”

“I have no faith in those oaths,” said Andres; “I would rather have now something to help me to get to Seville than all the revenges in the world; if you have here anything to eat that I can take with me, give it me, and God be with your worship and all knights-errant; and may their errands turn out as well for themselves as they have for me.”

Sancho took out from his store a piece of bread and another of cheese, and giving them to the lad he said, “Here, take this, brother Andres, for we have all of us a share in your misfortune.”

“Why, what share have you got?”

“This share of bread and cheese I am giving you,” answered Sancho; “and God knows whether I shall feel the want of it myself or not; for I would have you know, friend, that we squires to knights-errant have to bear a great deal of hunger and hard fortune, and even other things more easily felt than told.”

Andres seized his bread and cheese, and seeing that nobody gave him anything more, bent his head, and took hold of the road, as the saying is. However, before leaving he said, /

“For the love of God, sir knight-errant, if you ever meet me again, though you may see them cutting me to pieces, give me no aid or succour, but leave me to my misfortune, which will not be so great but that a greater will come to me by being helped by your worship, on whom and all the knights-errant that have ever been born God send his curse.”

Don Quixote was getting up to chastise him, but he took to his heels at such a pace that no one attempted to follow him; and mightily chapfallen was Don Quixote at Andres’ story, and the others had to take great care to restrain their laughter so as not to put him entirely out of countenance.

c31e.jpg (32K)

--

31.4 閣下 kā 我 ùi 橡樹放落來

31.4 Koh-hā kā góa ùi chhiūⁿ-chhiū pàng lo̍h-lâi

"O, lí ū-kàu gōng koh thian-chin!" Don Quixote kóng, "lí kám khòaⁿ bē chhut, Sancho, che ē hō͘ yi koh-khah hoaⁿ-hí? Lí tio̍h chai, kin-kì goán khî-sū-tō ê siūⁿ-hoat, ū chē-chē iû-kiap khî-sū hāu-lô, che sī hu-jîn ke̍k kong-êng ê tāi-chì. Khî-sū ê hāu-lô, tan-sûn sī ūi-tio̍h hāu-lô niâ, he úi-tāi, chin-sêng ê hōng-hiàn, kan-ta sī hi-bāng yi chiap-siū in chò yi ê khî-sū, bô kiû pa̍t-hāng hôe-pò."

"Góa bat thiaⁿ soan-kàu su kóng," Sancho kóng, "lán tio̍h kō͘ hit-chióng ài, lâi ài lán ê Chú, tan-sûn ài i, m̄-sī kî-kiû êng-iāu a̍h kiaⁿ siū-tio̍h chhú-hoa̍t. Á nā-sī góa, góa ài i, ho̍k-sāi i, sī in-ūi i ē-tàng chò ê tāi-chì."

"Kúi lah, chng-kha sông!" Don Quixote kóng, "ū-sî lí kóng-ōe kài kia̍t! Lâng kiò-sī lí ū tha̍k-chheh neh."

"Kî-si̍t, góa m̄-bat jī neh."

Chit-sî, Nicholas Sai-hū hoah-siaⁿ, kiò in sió tán chi̍t-ē, in-ūi boeh tī hia ê sió chúi-chôaⁿ thêng-khùn, lim-chúi. Don Quixote thêng lo̍h-lâi, Sancho mā kài móa-ì, in-ūi kàu chit-chūn, i í-keng pe̍h-chha̍t kóng thiám ah, khióng-kiaⁿ chú-lâng lia̍h-pau. In-ūi sui-bóng i chai Dulcinea sī El Toboso ê chng-kha ko͘-niû, chit sì-lâng iáu m̄-bat khòaⁿ-kòe.

Cardenio taⁿ í-keng ōaⁿ chhēng Dorothea tī in hoat-hiān yi ê sî só͘ chhēng ê saⁿ-khò͘, sui-bóng m̄-sī kài hó, phēng i pún-lâi só͘ chhēng ê hó chē loh. In tī chúi-chôaⁿ piⁿ lo̍h khiâ, kō͘ sîn-hū ùi kheh-chàn chah chhut-lâi ê kháu-niû chí-iau, sui-bóng he m̄-sī siáⁿ hó mi̍h-kiāⁿ.

In tng-teh chia̍h ê sî, tú-hó ū chi̍t-ê siàu-liân-ke keng-kòe. Hit-lâng thêng-kha khòaⁿ chúi-chôaⁿ piⁿ chit-tīn lâng, hut-jiân cháu hiòng Don Quixote, lám-tiâu i ê kha-thúi, khai-sí pàng-siaⁿ tōa-khàu, kóng:

"O, sian-siⁿ, lí bē-kì-tit góa hioh? Khòaⁿ hō͘ chin, góa sī hit-ê siàu-liân-ke Andres lah, koh-hā ùi góa hông pa̍k-tio̍h ê chhiūⁿ-chhiū kā góa pàng lo̍h-lâi."

Don Quixote jīn-chhut i, khan i ê chhiú, oa̍t-hiòng chāi-tiûⁿ ê lâng, kóng:

"Lia̍t-ūi koh-hā tio̍h liáu-kái, iû-kiap khî-sū ū gōa-nī tiōng-iàu, in chó͘-chí sè-kan po̍k-tô͘ kap ok-kùn só͘ chò ê pháiⁿ-sū kap siong-hāi. Góa kā lín kóng, kúi-kang chêng, góa keng-kòe chi̍t-ê chhiū-nâ, thiaⁿ-tio̍h kiò-siaⁿ kap ai-thàn, ná chhiūⁿ ū lâng teh kan-khó͘, thoa-bôa. Chek-sî, chhut-chū chek-jīm-kám, góa kóaⁿ-kín hiòng siaⁿ-im thoân-lâi ê só͘-chāi, hoat-hiān chi̍t-ê siàu-liân-ke hông pa̍k tī chi̍t-châng chhiūⁿ-chhiū téng. Taⁿ khiā tī lín bīn-chêng ê tō sī hit-ê gín-á. Góa chin hoaⁿ-hí i tī chia, in-ūi i ē-tàng chèng-bêng góa só͘ kóng ê, bô pòaⁿ-kù ké-ōe.

"Góa kóng, i hông pa̍k tī chi̍t-châng chhiūⁿ-chhiū téng, thǹg-pak-theh. Chi̍t-ê chò-sit lâng, āu-lâi góa hoat-hiān he sī in chú-lâng, kō͘ lî-á khan-soh teh sut i. Chi̍t-ē khòaⁿ tio̍h, góa tō mn̄g i, siáⁿ lí-iû i chiah chân-jím teh kā sut. Lông-hu ìn kóng, i kā sut, in-ūi che sī i ê po̍k-jîn, chò tāi-chì bô tek-tiāⁿ, m̄-sī gōng, sī bô láu-si̍t. Tān, chit-ê gín-á hiaⁿ kóng, ‘Sian-siⁿ, i kā góa sut, kan-ta in-ūi góa kā i thó kang-chu,’ Hit-ê chú-lâng koh kóng kóa góa thiaⁿ bô ê kái-soeh kap piān-kái. Sui-bóng góa ū kā thiaⁿ, tān-sī góa bô siong-sìn.

"Kán-tan kóng, góa pek hit-ê chò-sit lâng kā gín-á tháu lo̍h-lâi, koh chhōa i tńg-khì, chiàu gia̍h kā kang-chu hù hō͘ i, sīm-chì ke-gia̍h hō͘ i. Che lóng sī chin ê, kám m̄-sī, góa ê koai gín-á Andres? Lí kám bô chù-ì tio̍h, góa kā i hoan-hù kah gōa-nī ui-hong, á i sī gōa-nī khiam-pi, tah-èng boeh chò-kàu it-chhè góa tùi i ê chí-sī, kui-tēng, kap iau-kiû? Ti̍t-chiap hôe-tap, bián tiû-tû, kā hoat-seng ê tāi-chì kóng hō͘ chiah-ê sin-sū thiaⁿ, hō͘ in liáu-kái, ū iû-kiap khî-sū chhut-gōa sī chin iú-lī."

"Koh-hā só͘ kóng ê lóng sī chin ê," siàu-liân-ke kóng, "m̄-koh, tāi-chì ê kiat-kio̍k tú-hó kap koh-hā só͘ siūⁿ ê tian-tò-péng."

"Haⁿ-á! tian-tò-péng?" Don Quixote kóng, "hit-ê chng-kha lâng bô hù kang-chu hō͘ lí?"

--

31.4 閣下 kā 我 ùi 橡樹放落來

"O, 你有夠戇 koh 天真!" Don Quixote 講, "你 kám 看袂出, Sancho, che ē hō͘ 她 koh-khah 歡喜? 你著知, 根據阮騎士道 ê 想法, 有濟濟遊俠騎士效勞, che 是夫人極光榮 ê 代誌. 騎士 ê 效勞, 單純是為著效勞 niâ, he 偉大, 真誠 ê 奉獻,  kan-ta 是希望她接受 in 做她 ê 騎士, 無求別項回報."

"我 bat 聽宣教師講," Sancho 講, "咱著 kō͘ 彼種愛, 來愛咱 ê 主, 單純愛伊, 毋是祈求榮耀 a̍h 驚受著處罰. Á 若是我, 我愛伊, 服侍伊, 是因為伊 ē-tàng 做 ê 代誌."

"鬼 lah, 庄跤倯!" Don Quixote 講, "有時你講話 kài kia̍t! 人叫是你有讀冊 neh."

"其實, 我 m̄-bat 字 neh."

這時, Nicholas 師傅喝聲, 叫 in 小等一下, 因為欲 tī hia ê 小水泉停睏, 啉水. Don Quixote 停落來, Sancho mā kài 滿意, 因為到這陣, 伊已經白賊講忝 ah, 恐驚主人掠包. 因為雖罔伊知 Dulcinea 是 El Toboso ê 庄跤姑娘, 這世人猶 m̄-bat 看過.

Cardenio 今已經換穿 Dorothea tī in 發現她 ê 時所穿 ê 衫褲, 雖罔毋是 kài 好, 並伊本來所穿 ê 好濟 loh. In tī 水泉邊落騎, kō͘ 神父 ùi 客棧扎出來 ê 口糧止枵, 雖罔 he 毋是啥好物件.

In tng-teh 食 ê 時, 拄好有一个少年家經過. Hit 人停跤看水泉邊 chit 陣人, 忽然走向 Don Quixote, 攬牢伊 ê 跤腿, 開始放聲大哭, 講:

"O, 先生, 你袂記得我 hioh? 看 hō͘ 真, 我是彼个少年家 Andres lah, 閣下 ùi 我 hông 縛著 ê 橡樹 kā 我放落來."

Don Quixote 認出伊, 牽伊 ê 手, 越向在場 ê 人, 講:

"列位閣下著了解, 遊俠騎士有 gōa-nī 重要, in 阻止世間暴徒 kap 惡棍所做 ê 歹事 kap 傷害. 我 kā 恁講, 幾工前, 我經過一个樹林, 聽著叫聲 kap 哀嘆, ná 像有人 teh 艱苦, 拖磨. 即時, 出自責任感, 我趕緊向聲音傳來 ê 所在, 發現一个少年家 hông 縛 tī 一叢橡樹頂. 今徛 tī 恁面前 ê tō 是彼个囡仔. 我真歡喜伊 tī chia, 因為伊 ē-tàng 證明我所講 ê, 無半句假話.

"我講, 伊 hông 縛 tī 一叢橡樹頂, 褪腹裼. 一个做穡人, 後來我發現 he 是 in 主人, kō͘ 驢仔牽索 teh sut 伊. 一下看著, 我 tō 問伊, 啥理由伊 chiah 殘忍 teh kā sut. 農夫應講, 伊 kā sut, 因為 che 是伊 ê 僕人, 做代誌無得定, 毋是戇, 是無老實. 但, 這个囡仔兄講, ‘先生, 伊 kā 我 sut, kan-ta 因為我 kā 伊討工資,’ 彼个主人 koh 講寡我聽無 ê 解說  kap 辯解. 雖罔我有 kā 聽, 但是我無相信.

"簡單講, 我迫彼个做穡人 kā 囡仔敨落來, koh 𤆬伊轉去, 照額 kā 工資付 hō͘ 伊, 甚至加額 hō͘ 伊. Che lóng 是真 ê, kám 毋是, 我 ê 乖囡仔 Andres? 你 kám 無注意著, 我 kā 伊吩咐 kah gōa-nī 威風, á 伊是 gōa-nī 謙卑, 答應欲做到一切我 tùi 伊 ê 指示, 規定, kap 要求? 直接回答, 免躊躇, kā 發生 ê 代誌講 hō͘ chiah-ê 紳士聽, hō͘ in 了解, 有遊俠騎士出外是真有利."

"閣下所講 ê lóng 是真 ê," 少年家講, "m̄-koh, 代誌 ê 結局拄好 kap 閣下所想 ê 顛倒反."

"Haⁿ-á! 顛倒反?" Don Quixote 講, "彼个庄跤人無付工資 hō͘ 你?"

--

31.4

“O, how silly and simple thou art!” said Don Quixote; “seest thou not, Sancho, that this tends to her greater exaltation? For thou must know that according to our way of thinking in chivalry, it is a high honour to a lady to have many knights-errant in her service, whose thoughts never go beyond serving her for her own sake, and who look for no other reward for their great and true devotion than that she should be willing to accept them as her knights.”

“It is with that kind of love,” said Sancho, “I have heard preachers say we ought to love our Lord, for himself alone, without being moved by the hope of glory or the fear of punishment; though for my part, I would rather love and serve him for what he could do.”

“The devil take thee for a clown!” said Don Quixote, “and what shrewd things thou sayest at times! One would think thou hadst studied.”

“In faith, then, I cannot even read.”

Master Nicholas here called out to them to wait a while, as they wanted to halt and drink at a little spring there was there. Don Quixote drew up, not a little to the satisfaction of Sancho, for he was by this time weary of telling so many lies, and in dread of his master catching him tripping, for though he knew that Dulcinea was a peasant girl of El Toboso, he had never seen her in all his life. /

Cardenio had now put on the clothes which Dorothea was wearing when they found her, and though they were not very good, they were far better than those he put off. They dismounted together by the side of the spring, and with what the curate had provided himself with at the inn they appeased, though not very well, the keen appetite they all of them brought with them.

While they were so employed there happened to come by a youth passing on his way, who stopping to examine the party at the spring, the next moment ran to Don Quixote and clasping him round the legs, began to weep freely, saying, /

“O, señor, do you not know me? Look at me well; I am that lad Andres that your worship released from the oak-tree where I was tied.”

Don Quixote recognised him, and taking his hand he turned to those present and said: /

“That your worships may see how important it is to have knights-errant to redress the wrongs and injuries done by tyrannical and wicked men in this world, I may tell you that some days ago passing through a wood, I heard cries and piteous complaints as of a person in pain and distress; I immediately hastened, impelled by my bounden duty, to the quarter whence the plaintive accents seemed to me to proceed, and I found tied to an oak this lad who now stands before you, which in my heart I rejoice at, for his testimony will not permit me to depart from the truth in any particular. /

He was, I say, tied to an oak, naked from the waist up, and a clown, whom I afterwards found to be his master, was scarifying him by lashes with the reins of his mare. As soon as I saw him I asked the reason of so cruel a flagellation. The boor replied that he was flogging him because he was his servant and because of carelessness that proceeded rather from dishonesty than stupidity; on which this boy said, ‘Señor, he flogs me only because I ask for my wages.’ The master made I know not what speeches and explanations, which, though I listened to them, I did not accept. /

In short, I compelled the clown to unbind him, and to swear he would take him with him, and pay him real by real, and perfumed into the bargain. Is not all this true, Andres my son? Didst thou not mark with what authority I commanded him, and with what humility he promised to do all I enjoined, specified, and required of him? Answer without hesitation; tell these gentlemen what took place, that they may see that it is as great an advantage as I say to have knights-errant abroad.”

“All that your worship has said is quite true,” answered the lad; “but the end of the business turned out just the opposite of what your worship supposes.”

“How! the opposite?” said Don Quixote; “did not the clown pay thee then?”

--

31.3 請閣下著揀海岸

31.3 Chhiáⁿ koh-hā tio̍h kéng hái-hōaⁿ

"Cháu ná poe!" Don Quixote kóng, "tio̍h, iáu ū chi̍t-tīn iau-mô͘ kúi-koài, in ē-tàng sì-kè cháu, mā hō͘ lâng sì-kè cháu koh bē-thiám, chiàu ka-tī ì-sù, boeh án-chóaⁿ tō án-choáⁿ. M̄-koh, chiām-sî kā che àn-hā, lí án-chóaⁿ siūⁿ, goán hu-jîn bēng-lēng góa khì kìⁿ yi, góa tio̍h án-choáⁿ chò? Sui-bóng góa kám-kak, góa tio̍h ho̍k-chiông yi ê bēng-lēng, góa mā kám-kak, góa bē-sái bô si̍t-hêng góa tah-èng chit-ūi pôe lán kiâⁿ ê kong-chú ê un-hūi. Khî-sū-tō ê kui-kí pek góa tio̍h seng chun-siú iok-sok, chiah khó-lī ka-tī ê soán-te̍k. Chi̍t hong-bīn, ài-boeh kìⁿ goán hu-jîn ê io̍k-bōng teh kā góa chiat-bôa, lēng hong-bīn, góa ê chong-giâm iok-sok í-ki̍p ùi chit-tiûⁿ lāng-hiám boeh tit-tio̍h ê êng-iāu iū hō͘ góa pàng bē lo̍h-chhiú. Tān-sī, góa siūⁿ góa eng-kai kín-kín khì-kàu hit-ê kī-jîn hia, chi̍t-ē kàu-ūi tō kā i ê thâu chām lo̍h-lâi, hō͘ kong-chú koh tit-tio̍h ông-kok ê thài-pêng, jiân-āu sûi khì pài-kìⁿ sù góa kong-bêng ê kng, hiòng yi soeh-bêng góa án-ne ê chioh-kháu, hō͘ yi ín-chún góa khah bān kàu-ūi. In-ūi yi ē hoat-hiān, che oân-choân ē-tit cheng-ka yi ê êng-iāu kap miâ-siaⁿ. In-ūi it-chhè góa chit sì-lâng kō͘ chhiú-kut só͘ í-keng tit-tio̍h ê, tng-teh tit-tio̍h ê, a̍h chiong boeh tit-tio̍h ê, lóng sī in-ūi yi hō͘ góa ê un-hūi, mā in-ūi góa sī yi ê."

"Ah! Koh-hā ê thâu-khak sī án-chóaⁿ ah lah!" Sancho kóng, "Chhiáⁿ kā góa kóng, sian-siⁿ, lí sī kóng, lí boeh khang-kiâⁿ chit-chōa lō͘, hòng-khì chiah tōa-tù ê hun-in? He kè-chng sī kui-ê ông-kok, thiaⁿ-kóng he chiu-ûi chhiau-kòe 20,000 league [96,000 km], chhiong-móa seng-oa̍h su-iàu ê bu̍t-sán, khah tōa kòe kā Portugal kap Castile tàu chò-hóe.

"Léng-chēng lah, khòaⁿ tī Sîn ê ài! Lí tio̍h ūi ka-tī kóng ê ōe kám-kak pháiⁿ-sè. Thiaⁿ góa kiàn-gī, chhiáⁿ goân-liōng góa, chi̍t-ē kàu ū kàu-sū ê chng-thâu, lí tō kín pān kiat-hun. Nā bô, lán mā ū ka-tī ê sîn-hū, i mā ē-hiáu kā hun-lé pān kah hó-sè liu-liu. Kì-tio̍h, góa chit-pé hòe-thâu, ū-kàu chu-keh kā lí kiàn-gī ah lah. Góa taⁿ chit-ê kiàn-gī, ha̍p-lí koh thò-tòng. In-ūi chi̍t-chiah chhek-chiáu-á lia̍h tī chhiú, khah iâⁿ kòe chi̍t-chiah lāi-hio̍h poe tī thiⁿ. Pàng khui chhiú-tiong ê hó mi̍h, khì kéng bái-mi̍h ê lâng, liân i só͘ hiâm ê hó-mi̍h to tit bē-tio̍h neh."

"Thiaⁿ hō͘ hó, Sancho," Don Quixote kóng, "ká-sú lí khǹg góa kiat-hun, sī ūi-tio̍h hō͘ góa tī thâi-sí kī-jîn liáu sûi chiâⁿ-chò kok-ông, hó-thang tùi lí si-un, hō͘ lí góa só͘ èng-ún ê, góa kā lí kóng, che góa chin kán-tan tō chò ē-kàu, m̄-bián kiat-hun tō ē-tàng boán-chiok lí ê io̍k-bōng. Tī chiūⁿ chiàn-tiûⁿ chìn-chêng, góa boeh thê-chhut tiâu-kiāⁿ, ká-sú góa chiàn-iâⁿ, siat-sú bô kiat-hun, in mā tio̍h sàng góa ông-kok ê chi̍t pō͘-hūn, he góa boeh kā sù hō͘ góa soán-te̍k ê lâng. Tán in kā he sàng hō͘ góa, lí siūⁿ, tî-liáu lí, góa ē kā he sù hō͘ siáng ah?"

"Án-ne kóng tō chheng-chhó ah lah," Sancho kóng, "tān, chhiáⁿ koh-hā tio̍h kéng hái-hōaⁿ, án-ne góa nā bô kah-ì hia ê seng-oa̍h, tō ē-tàng kā góa ê o͘-lâng chú-bîn chng-chûn ūn-cháu, chiàu góa kóng án-ne kā in hoa̍t-lo̍h. Taⁿ, mài siūⁿ kìⁿ Dulcinea Hj ê tāi-chì, seng khì thâi-sí hit-ê kī-jîn, seng oân-sêng chit-ê jīm-bū. Thiⁿ ah, góa kám-kak che sī ke̍k tōa êng-ū, ke̍k tōa lī-ek ê tāi-chì."

"Góa jīn-ûi, lí kóng liáu chin tio̍h, Sancho," Don Quixote kóng, "góa chiap-siū lí ê kiàn-gī, tī khì kìⁿ Dulcinea chìn-chêng, góa seng pôe-phōaⁿ kong-chú. Tān góa mā kiàn-gī lí, mài kā jīm-hô lâng, a̍h kap lán tâng-chê ê lâng, kóng lán tú-chiah khó-lī kap thó-lūn ê tāi-chì. In-ūi Dulcinea chiah-nī tāi-toān, yi bē hi-bāng pa̍t-lâng chai-iáⁿ yi ê siūⁿ-hoat, só͘-í lán bô khoân-lī kā he sia̍p-lāu chhut-khì."

"Kì-jiân án-ne," Sancho kóng, "sī án-chóaⁿ koh-hā iau-kiû só͘-ū pāi tī lí chhiú-kut ê lâng khì kìⁿ Dulcinea Hj? Che kám m̄-sī kap lí chhiam-miâ kóng lí ài yi, lí sī yi ê chêng-jîn kāng-khoán? Jî-chhiáⁿ hiah-ê khì ê lâng iū-koh su-iàu kūi tī yi bīn-chêng, kóng sī koh-hā phài in lâi kìⁿ yi, nā án-ne, lín nn̄g-lâng ê siūⁿ-hoat ná-ū khó-lêng chhàng ē-tiâu?"

--

31.3 請閣下著揀海岸

"走 ná 飛!" Don Quixote 講, "著, 猶有一陣妖魔鬼怪, in ē-tàng 四界走, mā hō͘ 人四界走 koh 袂忝, 照 ka-tī 意思, 欲按怎 tō 按怎. 毋過, 暫時 kā che 按下, 你按怎想, 阮夫人命令我去見她, 我著按怎做? 雖罔我感覺, 我著服從她 ê 命令, 我 mā 感覺, 我袂使無實行我答應 chit 位陪咱行 ê 公主 ê 恩惠. 騎士道 ê 規矩迫我著先遵守約束, 才考慮 ka-tī ê 選擇. 一方面, 愛欲見阮夫人 ê 慾望 teh kā 我折磨, 另方面, 我 ê 莊嚴約束以及 ùi 這場弄險欲得著 ê 榮耀又 hō͘ 我放袂落手. 但是, 我想我應該緊緊去到彼个巨人 hia, 一下到位 tō kā 伊 ê 頭鏨落來, hō͘ 公主 koh 得著王國 ê 太平, 然後隨去拜見賜我光明 ê 光, 向她說明我 án-ne ê 借口, hō͘ 她允准我 khah 慢到位. 因為她 ē 發現, che 完全 ē-tit 增加她 ê 榮耀 kap 名聲. 因為一切我這世人 kō͘ 手骨所已經得著 ê, tng-teh 得著 ê, a̍h 將欲得著 ê, lóng 是因為她 hō͘ 我 ê 恩惠, mā 因為我是她 ê."

"Ah! 閣下 ê 頭殼是按怎 ah lah!" Sancho 講, "請 kā 我講, 先生, 你是講, 你欲空行 chit 逝路, 放棄 chiah 大注 ê 婚姻? He 嫁粧是規个王國, 聽講 he 周圍超過 20,000 league [96,000 km], 充滿生活需要 ê 物產, khah 大過 kā Portugal kap Castile 鬥做伙.

"冷靜 lah, 看 tī 神 ê 愛! 你著為 ka-tī 講 ê 話感覺歹勢. 聽我建議, 請原諒我, 一下到有教士 ê 庄頭, 你 tō 緊辦結婚. 若無, 咱 mā 有 ka-tī ê 神父, 伊 mā 會曉 kā 婚禮辦 kah 好勢 liu-liu. 記著, 我 chit-pé 歲頭, 有夠資格 kā 你建議 ah lah. 我今這个建議, 合理 koh 妥當. 因為一隻粟鳥仔掠 tī 手, khah 贏過一隻 lāi-hio̍h 飛 tī 天. 放開手中 ê 好物, 去揀䆀物 ê人, 連伊所嫌 ê 好物 to 得袂著 neh."

"聽 hō͘ 好, Sancho," Don Quixote 講, "假使你勸我結婚, 是為著 hō͘ 我 tī 刣死巨人了隨成做國王, hó-thang tùi 你施恩, hō͘ 你我所應允 ê, 我 kā 你講, che 我真簡單 tō 做 ē-kàu, 毋免結婚 tō ē-tàng 滿足你 ê 慾望. Tī 上戰場進前, 我欲提出條件, 假使我戰贏, 設使無結婚, in mā 著送我王國 ê 一部份, he 我欲 kā 賜 hō͘ 我選擇 ê 人. 等 in kā he 送 hō͘ 我, 你想, 除了你, 我 ē kā he 賜 hō͘ siáng ah?"

"Án-ne 講 tō 清楚 ah lah," Sancho 講, "但, 請閣下著揀海岸, án-ne 我若無佮意 hia ê 生活, tō ē-tàng kā 我 ê 烏人子民裝船運走, 照我講 án-ne kā in 發落. 今, 莫想見 Dulcinea Hj ê 代誌, 先去刣死彼个巨人, 先完成這个任務. 天 ah, 我感覺 che 是極大榮譽, 極大利益 ê 代誌."

"我認為, 你講了真著, Sancho," Don Quixote 講, "我接受你 ê 建議, tī 去見 Dulcinea 進前, 我先陪伴公主. 但我 mā 建議你, 莫 kā 任何人, a̍h kap 咱同齊 ê 人, 講咱拄才考慮 kap 討論 ê 代誌. 因為 Dulcinea chiah-nī 大段, 她袂希望別人知影她 ê 想法, 所以咱無權利 kā he 洩漏出去."

"既然 án-ne," Sancho 講, "是按怎閣下要求所有敗 tī 你手骨 ê 人去見 Dulcinea Hj? Che kám 毋是 kap 你簽名講你愛她, 你是她 ê 情人仝款? 而且 hiah-ê 去 ê 人 iū-koh 需要跪 tī 她面前, 講是閣下派 in 來見她, 若 án-ne, 恁兩人 ê 想法那有可能藏 ē 牢?"

--

31.3

“Quicksilver!” said Don Quixote, “aye and what is more, a legion of devils, folk that can travel and make others travel without being weary, exactly as the whim seizes them. But putting this aside, what thinkest thou I ought to do about my lady’s command to go and see her? For though I feel that I am bound to obey her mandate, I feel too that I am debarred by the boon I have accorded to the princess that accompanies us, and the law of chivalry compels me to have regard for my word in preference to my inclination; on the one hand the desire to see my lady pursues and harasses me, on the other my solemn promise and the glory I shall win in this enterprise urge and call me; but what I think I shall do is to travel with all speed and reach quickly the place where this giant is, and on my arrival I shall cut off his head, and establish the princess peacefully in her realm, and forthwith I shall return to behold the light that lightens my senses, to whom I shall make such excuses that she will be led to approve of my delay, for she will see that it entirely tends to increase her glory and fame; for all that I have won, am winning, or shall win by arms in this life, comes to me of the favour she extends to me, and because I am hers.”

“Ah! what a sad state your worship’s brains are in!” said Sancho. “Tell me, señor, do you mean to travel all that way for nothing, and to let slip and lose so rich and great a match as this where they give as a portion a kingdom that in sober truth I have heard say is more than twenty thousand leagues round about, and abounds with all things necessary to support human life, and is bigger than Portugal and Castile put together? /

Peace, for the love of God! Blush for what you have said, and take my advice, and forgive me, and marry at once in the first village where there is a curate; if not, here is our licentiate who will do the business beautifully; remember, I am old enough to give advice, and this I am giving comes pat to the purpose; for a sparrow in the hand is better than a vulture on the wing, and he who has the good to his hand and chooses the bad, that the good he complains of may not come to him.”

“Look here, Sancho,” said Don Quixote. “If thou art advising me to marry, in order that immediately on slaying the giant I may become king, and be able to confer favours on thee, and give thee what I have promised, let me tell thee I shall be able very easily to satisfy thy desires without marrying; for before going into battle I will make it a stipulation that, if I come out of it victorious, even I do not marry, they shall give me a portion of the kingdom, that I may bestow it upon whomsoever I choose, and when they give it to me upon whom wouldst thou have me bestow it but upon thee?”

“That is plain speaking,” said Sancho; “but let your worship take care to choose it on the seacoast, so that if I don’t like the life, I may be able to ship off my black vassals and deal with them as I have said; don’t mind going to see my lady Dulcinea now, but go and kill this giant and let us finish off this business; for by God it strikes me it will be one of great honour and great profit.”

“I hold thou art in the right of it, Sancho,” said Don Quixote, “and I will take thy advice as to accompanying the princess before going to see Dulcinea; but I counsel thee not to say anything to anyone, or to those who are with us, about what we have considered and discussed, for as Dulcinea is so decorous that she does not wish her thoughts to be known it is not right that I or anyone for me should disclose them.”

“Well then, if that be so,” said Sancho, “how is it that your worship makes all those you overcome by your arm go to present themselves before my lady Dulcinea, this being the same thing as signing your name to it that you love her and are her lover? And as those who go must perforce kneel before her and say they come from your worship to submit themselves to her, how can the thoughts of both of you be hid?”

--