39.3 Góa kò-chûn, bô tit-tio̍h chū-iû ê hi-bāng
Tāi-chì ê hoat-seng sī án-ne: Algiers kok-ông El Uchali, sī tōa-táⁿ koh sêng-kong ê hái-chha̍t, kong-kek koh hu-ló͘ Malta ê chú-le̍k chiàn-chûn, lāi-bīn kan-ta chhun saⁿ-ê oa̍h-tio̍h ê khî-sū, lóng í-keng siū tāng-siong. Hit-sî, góa kap góa ê liân-tūi tī John Andrea ê chú-le̍k chiàn-chûn téng, goán khì chi-oān, chiàu kai-tong chò ê, góa thiàu-chiūⁿ te̍k-jîn ê chiàn-chûn, tān, in-ūi te̍k-chûn tng-teh thoat-lī i kong-kek ê chûn, hāi góa ê pō͘-hā tòe bô tio̍h góa. Só͘-tì, góa hoat-hiān ka-tī ko͘ chi̍t-ê hām-lo̍h tī te̍k-jîn ê pau-ûi, lâng chē kah góa bô hoat-tō͘ té-khòng. Kiat-kó, góa pī lia̍h, sin siū siong. Lín mā chai, El Uchali chhōa i ê jîn-má cháu khui, á góa chiâⁿ-chò i ê hu-ló͘. Góa sī só͘-ū chē-chē hoaⁿ-hí ê lâng tiong-kan, ûi-it pi-siong ê lâng, chē-chē chū-iû lâng tiong-kan ûi-it ê hu-ló͘. In-ūi ū 15,000-ê Kitok-tô͘, tī Turk chûn-tūi chò khó͘-kang ê lâng, tī hit-kang lóng tit-tio̍h chū-iû.
In kā góa chhōa khì Constantinople, Turk Tōa-tè Selim hong góa ê chú-lâng chò hái-kun su-lēng, in-ūi i tī chiàn-tàu chīn-chit, koh chah tńg-lâi Malta Khî-sū Thoân kun-kî chò chèng-kì. Keh-tńg nî, its 72 nî [1572], góa lûn-lo̍h tī Navarino ê chi̍t-chiah saⁿ-teng chú-le̍k chiàn-chûn téng kò-chûn. Tī hia, góa koan-chhat tio̍h, chin hó ê cheng-ho̍k kui-ê Turk chûn-tūi ê ki-hōe sī án-chóaⁿ sit-khì. In-ūi só͘-ū sio̍k-tī Turk chûn-tūi ê lio̍k-chiàn tūi kap cheng-eng pō͘-tūi lóng khak-sìn, in ē tī káng-lāi cho-siū kong-kek, lóng khoán hó pau-ho̍k-á kap ê-á, chi̍t-ē teng-lio̍k bōe siū kong-kek tō boeh soan. Che tō sī in tùi lán chûn-tūi ê kiaⁿ-chhoah.
Tān, Thiⁿ-ì m̄-sī án-ne. Lán chit-pêng hōaⁿ-thâu ê chiong-kun pēng bô kòe-sit a̍h so͘-hut, sī Kitok-kàu Kài ê chōe-gia̍t, sī Sîn ê chí-ì, boeh hō͘ lán tit-tio̍h chhú-hoa̍t. Kiat-kó, El Uchali tô-lān kàu Navarino hū-kīn ê Modon Tó, teng-lio̍k pō͘-tūi ka-kiông káng-kháu ê kang-sū, chēng-chēng tī hia tán Don John thè-peng.
Tī chit-pái oán-cheng, ū lia̍h-tio̍h chi̍t-chiah kiò “Siúⁿ” ê chiàn-chûn, he chûn-tiúⁿ sī chhut-miâ hái-chha̍t Barbarossa ê hāu-seⁿ. I sī hō͘ kiò Lông-bó ê Neapolis chiàn-chûn lia̍h-tio̍h, chí-hui Lông-bó ê chí-hui-koaⁿ sī Santa Cruz Hô͘-chiok Don Álvaro de Bazan, i sī chiàn-cheng phek-le̍k, sū-peng ê sī-tōa, sêng-kong bô-te̍k ê chûn-tiúⁿ. Góa tek-khak tio̍h kā lín kóng, lia̍h-tio̍h Siúⁿ chiàn-chûn ê keng-kòe.
Barbarossa ê hāu-seⁿ kài chân-jím, tùi lô͘-lē khek-po̍k, só͘-tì, kò-chûn ê lô͘-lē khòaⁿ tio̍h Lông-bó chiàn-chûn pek-óa, tit-boeh jiok-tio̍h ê sî, in sûi pàng-lo̍h chûn-chiúⁿ, lia̍h-khí khiā tī chûn-bóe tâi-téng hoah ta̍k-ê piàⁿ-miā kò ê chûn-tiúⁿ, chi̍t-pâi koh chi̍t-pâi, ùi chûn-bóe kā i kau-chiap kàu chûn-thâu, koh chi̍t-lâng kā i kā chi̍t-chhùi, tì-kàu to iáu-bōe kàu ûi-koaiⁿ ê sî, i ê lêng-hûn tō í-keng khì kàu tē-ga̍k ah. Tō ná góa kóng ê, i tùi lâng siuⁿ-kòe chân-jím, chèng-lâng chiah ē hiah-nī oàn-chheh i.
Goán tńg kàu Constantinople, keh-tńg nî, 73 nî, thiaⁿ-kóng Don John kong-chiàm Tunis, ùi Turk toa̍t-hôe chit-ê ông-kok, kā kau hō͘ Muley Hamet tī-lí, toān-choa̍t liáu Muley Hamida, sè-kài chòe chân-jím, chho͘-chhân ê Moor lâng, koh tńg-khì hia thóng-tī ê hi-bāng. Turk Tōa-tè tùi chit-ê sún-sit ke̍k gêng-sim, tō kō͘ Turk lâng ê kan-khiáu, kap ǹg-bāng hô-pêng ê Venezia lâng ta̍t-sêng hô-pêng hia̍p-gī. Keh-tńg nî, 74 nî, i khì chìn-kong Tunis hū-kīn ê Goletta í-ki̍p Don John tī hia kiàn-siat chi̍t-pòaⁿ ê pó-lúi.
It-chhè chiah-ê sū-kiāⁿ hoat-seng kî-kan, góa sin-khó͘ kò-chûn, bô chi̍t-sut-á tit-tio̍h chū-iû ê hi-bāng, siōng-bô sī bô khó-lêng thàu-kòe o͘-se lâi tit-tio̍h, in-ūi góa koat-ì m̄ siá-phe hō͘ lāu-pē chai-iáⁿ góa ê put-hēng. Chiong-kî-bóe, Goletta lûn-hām, pó-lúi mā lûn-hām. Hit-sî, hia ū 7-bān 5-chheng Turk chèng-kui kun-jîn, koh ū chhiau-kòe 40-bān ùi Afrika kok-tē lâi ê Moor lâng kap Arab lâng, í-ki̍p tāi-liōng chiàn-cheng bu̍t-chu kap chong-pī chi-oān, koh ū chē-chē kang-peng, kō͘ chhiú me thô to khó-lêng ē-tit kā Goletta kap pó-lúi khàm-kòe ah.
Siōng tāi-seng lûn-hām ê sī Goletta, chìn-chêng jīn-ûi kong bē-lo̍h, tān lûn-hām ah, m̄-sī hông-ūi chiá ê kòe-sit, in í-keng chīn-la̍t, ē-tàng chò, eng-kai chò ê lóng chò ah. Si̍t-giām chèng-bêng, tī hit só͘-chāi ê soa-bo̍k chin kán-tan tō ē-tàng óe chiàn-hô. Í-chêng tī nn̄g-ê chhiú-tê [tāi-khài 20 cm] chhim ê ūi tō ū chúi, tān Turk lâng óe 2-bā [183 cm] chhim iáu chhōe bô, só͘-í in kō͘ tāi-liōng ê soa-pau kā kang-sū thia̍p koân, koân kah pí pó-lúi siâⁿ-chhiûⁿ khah koân, ná chhiūⁿ khî-peng án-ne sàu hiòng in, tì-kàu bô-lâng ē-tit chih-chài a̍h hông-ūi.
--
39.3 我划船, 無得著自由 ê 希望
代誌 ê 發生是 án-ne: Algiers 國王 El Uchali, 是大膽 koh 成功 ê 海賊, 攻擊 koh 俘虜 Malta ê 主力戰船, 內面 kan-ta 賰三个活著 ê 騎士, lóng 已經受重傷. 彼時, 我 kap 我 ê 連隊 tī John Andrea ê 主力戰船頂, 阮去支援, 照該當做 ê, 我跳上敵人 ê 戰船, 但, 因為敵船 tng-teh 脫離伊攻擊 ê 船, 害我 ê 部下綴無著我. 所致, 我發現 ka-tī 孤一个陷落 tī 敵人 ê 包圍, 人濟 kah 我無法度抵抗. 結果, 我被掠, 身受傷. 恁 mā 知, El Uchali 𤆬伊 ê 人馬走開, á 我成做伊 ê 俘虜. 我是所有濟濟歡喜 ê 人中間, 唯一悲傷 ê 人, 濟濟自由人中間唯一 ê 俘虜. 因為有 15,000 个 Kitok 徒, tī Turk 船隊做苦工 ê 人, tī 彼工 lóng 得著自由.
In kā 我𤆬去 Constantinople, Turk 大帝 Selim 封我 ê 主人做海軍司令, 因為伊 tī 戰鬥盡職, koh 扎轉來 Malta 騎士團軍旗做證據. 隔轉年, its 72 年 [1572], 我淪落 tī Navarino ê 一隻三燈主力戰船頂划船. Tī hia, 我觀察著, 真好 ê 征服規个 Turk 船隊 ê 機會是按怎失去. 因為所有屬 tī Turk 船隊 ê 陸戰隊 kap 精英部隊 lóng 確信, in ē tī 港內遭受攻擊, lóng 款好包袱仔 kap 鞋仔, 一下登陸未受攻擊 tō 欲 soan. Che tō 是 in 對咱船隊 ê 驚掣.
但, 天意毋是 án-ne. 咱這爿扞頭 ê 將軍並無過失 a̍h 疏忽, 是 Kitok 教界 ê 罪孽, 是神 ê 旨意, 欲 hō͘ 咱得著處罰. 結果, El Uchali 逃難到 Navarino 附近 ê Modon 島, 登陸部隊加強港口 ê 工事, 靜靜 tī hia 等 Don John 退兵.
Tī 這擺遠征, 有掠著一隻叫 "賞" ê 戰船, he 船長是出名海賊 Barbarossa ê 後生. 伊是 hō͘ 叫 "狼母" ê Neapolis 戰船掠著, 指揮 "狼母" ê 指揮官是 Santa Cruz 侯爵 Don Álvaro de Bazan, 伊是戰爭霹靂, 士兵 ê 序大, 成功無敵 ê 船長. 我的確著 kā 恁講, 掠著 "賞" 戰船 ê 經過.
Barbarossa ê 後生 kài 殘忍, 對奴隸刻薄, 所致, 划船 ê 奴隸看著 "狼母" 戰船迫倚, 得欲逐著 ê 時, in 隨放落船槳, 掠起徛 tī 船尾台頂喝逐个拚命划 ê 船長, 一排 koh 一排, ùi 船尾 kā 伊交接到船頭, koh 一人 kā 伊咬一喙, 致到 to 猶未到桅杆 ê 時, 伊 ê 靈魂 tō 已經去到地獄 ah. Tō ná 我講 ê, 伊對人 siuⁿ 過殘忍, 眾人才 ē hiah-nī 怨慼伊.
阮轉到 Constantinople, 隔轉年, 73 年, 聽講 Don John 攻佔 Tunis, ùi Turk 奪回這个王國, kā 交 hō͘ Muley Hamet 治理, 斷絕了 Muley Hamida, 世界最殘忍, 粗殘 ê Moor 人, koh 轉去 hia 統治 ê 希望. Turk 大帝對這个損失極凝心, tō kō͘ Turk 人 ê 奸巧, kap ǹg 望和平 ê Venezia 人達成和平協議. 隔轉年, 74 年, 伊去進攻 Tunis 附近 ê Goletta 以及 Don John tī hia 建設一半 ê 堡壘.
一切 chiah-ê 事件發生期間, 我辛苦划船, 無一屑仔得著自由 ê 希望, 上無是無可能透過 o͘-se 來得著, 因為我決意毋寫批 hō͘ 老爸知影我 ê 不幸. 終其尾, Goletta 淪陷, 堡壘 mā 淪陷. 彼時, hia 有 7 萬 5 千 Turk 正規軍人, koh 有超過 40 萬 ùi Afrika 各地來 ê Moor 人 kap Arab 人, 以及大量戰爭物資 kap 裝備支援, koh 有濟濟工兵, kō͘ 手 me 塗 to 可能 ē-tit kā Goletta kap 堡壘崁過 ah.
上代先淪陷 ê 是 Goletta, 進前認為攻袂落, 但淪陷 ah, 毋是防衛者 ê 過失, in 已經盡力, ē-tàng 做, 應該做 ê lóng 做 ah. 實驗證明, tī 彼所在 ê 沙漠真簡單 tō ē-tàng 挖戰壕. 以前 tī 兩个手蹄 [大概 20 cm] 深 ê 位 tō 有水, 但 Turk 人挖 2 yard [183 cm] 深猶揣無, 所以 in kō͘ 大量 ê 沙包 kā 工事疊懸, 懸 kah 比堡壘城牆 khah 懸, ná 像騎兵 án-ne 掃向 in, 致到無人會得 chih-chài a̍h 防衛.
--
39.3
It happened in this way: El Uchali, the king of Algiers, a daring and successful corsair, having attacked and taken the leading Maltese galley (only three knights being left alive in it, and they badly wounded), the chief galley of John Andrea, on board of which I and my company were placed, came to its relief, and doing as was bound to do in such a case, I leaped on board the enemy’s galley, which, sheering off from that which had attacked it, prevented my men from following me, and so I found myself alone in the midst of my enemies, who were in such numbers that I was unable to resist; in short I was taken, covered with wounds; El Uchali, as you know, sirs, made his escape with his entire squadron, and I was left a prisoner in his power, the only sad being among so many filled with joy, and the only captive among so many free; for there were fifteen thousand Christians, all at the oar in the Turkish fleet, that regained their longed-for liberty that day.
They carried me to Constantinople, where the Grand Turk, Selim, made my master general at sea for having done his duty in the battle and carried off as evidence of his bravery the standard of the Order of Malta. The following year, which was the year seventy-two, I found myself at Navarino rowing in the leading galley with the three lanterns. There I saw and observed how the opportunity of capturing the whole Turkish fleet in harbour was lost; for all the marines and janizzaries that belonged to it made sure that they were about to be attacked inside the very harbour, and had their kits and pasamaques, or shoes, ready to flee at once on shore without waiting to be assailed, in so great fear did they stand of our fleet. /
But Heaven ordered it otherwise, not for any fault or neglect of the general who commanded on our side, but for the sins of Christendom, and because it was God’s will and pleasure that we should always have instruments of punishment to chastise us. As it was, El Uchali took refuge at Modon, which is an island near Navarino, and landing forces fortified the mouth of the harbour and waited quietly until Don John retired. /
On this expedition was taken the galley called the Prize, whose captain was a son of the famous corsair Barbarossa. It was taken by the chief Neapolitan galley called the She-wolf, commanded by that thunderbolt of war, that father of his men, that successful and unconquered captain Don Álvaro de Bazan, Marquis of Santa Cruz; and I cannot help telling you what took place at the capture of the Prize.
The son of Barbarossa was so cruel, and treated his slaves so badly, that, when those who were at the oars saw that the She-wolf galley was bearing down upon them and gaining upon them, they all at once dropped their oars and seized their captain who stood on the stage at the end of the gangway shouting to them to row lustily; and passing him on from bench to bench, from the poop to the prow, they so bit him that before he had got much past the mast his soul had already got to hell; so great, as I said, was the cruelty with which he treated them, and the hatred with which they hated him.
We returned to Constantinople, and the following year, seventy-three, it became known that Don John had seized Tunis and taken the kingdom from the Turks, and placed Muley Hamet in possession, putting an end to the hopes which Muley Hamida, the cruelest and bravest Moor in the world, entertained of returning to reign there. The Grand Turk took the loss greatly to heart, and with the cunning which all his race possess, he made peace with the Venetians (who were much more eager for it than he was), and the following year, seventy-four, he attacked the Goletta and the fort which Don John had left half built near Tunis. /
While all these events were occurring, I was labouring at the oar without any hope of freedom; at least I had no hope of obtaining it by ransom, for I was firmly resolved not to write to my father telling him of my misfortunes. At length the Goletta fell, and the fort fell, before which places there were seventy-five thousand regular Turkish soldiers, and more than four hundred thousand Moors and Arabs from all parts of Africa, and in the train of all this great host such munitions and engines of war, and so many pioneers that with their hands they might have covered the Goletta and the fort with handfuls of earth. /
The first to fall was the Goletta, until then reckoned impregnable, and it fell, not by any fault of its defenders, who did all that they could and should have done, but because experiment proved how easily entrenchments could be made in the desert sand there; for water used to be found at two palms depth, while the Turks found none at two yards; and so by means of a quantity of sandbags they raised their works so high that they commanded the walls of the fort, sweeping them as if from a cavalier, so that no one was able to make a stand or maintain the defence.
--
No comments:
Post a Comment